illegal moneylenders Maharashtra: विधानसभेच्या प्रश्नोत्तराच्या तासात शिवसेना उद्धव बाळासाहेब ठाकरे पक्षाचे आमदार संजय देरकर यांनी अवैध सावकारीचा मुद्दा उपस्थित केला होता. या चर्चेत आमदार नाना पटोले व समीर कुणावार यांनीही सहभाग घेतला. या चर्चेला उत्तर देताना सहकार मंत्री पाटील म्हणाले, “राज्यात एकूण १० हजार अवैध सावकारीच्या तक्रारी दाखल झाल्या असून त्यापैकी ८,१०० तक्रारी तपासणीदरम्यान निराधार असल्याचे आढळून आले. मात्र, उर्वरित प्रकरणांमध्ये सहकार विभागाने कारवाई करून जमिनी वाचवल्या आहेत. जिल्हाधिकाऱ्यांच्या अध्यक्षतेखालील समितीच्या बैठका नियमितपणे घेतल्या जात आहेत. तसेच डीडीआर कार्यालयात अवैध सावकारी संदर्भातील प्रकरणांसाठी स्वतंत्र कक्षही स्थापन करण्यात आला आहे,” असेही पाटील यांनी स्पष्ट केले.