परभणी ः सोयाबीन बियाण्यांची उगवणक्षमता (Soybean Germination) वाढविण्यासाठी संशोधनात्मक प्रयोग (Soybean Germination Research) घेण्यात येणार आहेत. त्यासाठी वसंतराव नाईक मराठवाडा कृषी विद्यापीठ (VNMKV) आणि अॅक्‍वॅटिक रेमेडीज लिमिडेट यांच्यात शुक्रवारी (ता. ७) सामंजस्य करार करण्यात आला.

कुलगुरू डॉ. इंद्र मणी यांच्या प्रमुख उपस्थितीत सामंजस्‍य करारावर विद्यापीठाच्‍या वतीने संशोधन संचालक डॉ. दत्तप्रसाद वासकर यांनी, तर अॅक्वॅटिक रेमेडीज लिमिडेटतर्फे भरत मेहता यांनी स्‍वाक्षरी केली.

या वेळी सहयोगी संचालक (बियाणे) डॉ. के. एस. बेग, बीज संशोधन अधिकारी डॉ. आर. आर. धुतमल, जनसंपर्क अधिकारी डॉ. प्रवीण कापसे, प्रणेश चांडक आदी उपस्थित होते.

सोयाबीन बियाण्यात उगवणक्षमतेची मोठी समस्‍या येते. उगवणक्षमता वाढविण्यासाठी ‘अॅक्‍वॅटिक रेमेडीज’ने इलेक्ट्रॉनिक उपकरण तयार केले आहे. त्याद्वारे २०२२-२३ आणि २०२३-२४ मध्ये विद्यापीठातील बीज तंत्रज्ञान संशोधन विभागामार्फत संशोधनात्‍मक प्रयोग घेण्यात येणार आहेत.