मोरगाव, ता. बारामती ः ‘‘शेती आणि शेतीपूरक व्यवसाय करताना शेतकऱ्यांनी कृषी विभागांच्या वेगवेगळ्या योजनांची माहिती घेऊन त्यांचा लाभ घ्यावा, त्यातून शेतकरी कुटुंबाचा आर्थिक स्तर उंचाविण्यास निश्चित मदत होईल,’’ असा विश्वास मोरगाव विभागाचे कृषी सहायक प्रसाद तावरे यांनी व्यक्त केला.

तरडोली (ता. बारामती) येथे बारामतीचे उपविभागीय कृषी अधिकारी वैभव तांबे यांच्या सूचनेनुसार शिवारफेरी व शेतकऱ्यांशी बैठकीद्वारे संवादाचे आयोजन करण्यात आले होते. या कार्यक्रमात शेतकऱ्यांशी संवाद साधताना तावरे बोलत होते.

कार्यक्रमाच्या अध्यक्षस्थानी तरडोली ग्रामपंचायतीच्या सरपंच विद्या भापकर होत्या. रोजगार हमी-फळबाग लागवड, नाडेफ, गांडूळ खत प्रकल्प, पुष्प लागवडीसाठी पात्रता निकष, आवश्यक कागदपत्रे, लाभार्थींची निवड या वेळी करण्यात आली.

महाडीबीटी पोर्टलद्वारे राबवण्यात येणाऱ्या ट्रॅक्टर, रोटावेटर, नांगर, ठिबक सिंचन, भाजीपाला रोपवाटिका आदी कृषी योजनांची माहिती या वेळी प्रसाद तावरे यांनी दिली. तसेच मृदा व जलसंधारण कामाची मागणीची नोंद या वेळी घेण्यात आली. या मागणीचा विचार करून मंडळ कृषी अधिकारी व तालुका कृषी अधिकारी यांच्या मार्गदर्शनाखाली भविष्यात तरडोली गावात निश्चित काम केले जाईल, असे कृषी विभागाकडून सांगण्यात आले.

या वेळी जिल्हा परिषदेच्या जलव्यवस्थापन समितीचे सदस्य हणमंत भापकर, चंद्रकांत भापकर, दिनेश भोसले, किसन भापकर, राजेंद्र सर्जे, संगीता साळवे व शेतकरी उपस्थित होते.

योग्य माहिती घेऊन अचूक प्रस्ताव दिल्यास कृषी विभागाच्या योजनांचा लाभ निश्चित मिळतो, त्यामुळे शेतकऱ्यांनी योजनांचा लाभ शेतीच्या विकासासाठी घेऊन मुलांना भविष्यकाळात शेतशिवारातच उद्योजकतेचा पायंडा पाडून द्यावा.

-विद्या भापकर, सरपंच