Sindhudurg News : ‘पंतप्रधान शेतकरी सन्मान योजने’अंतर्गत जिल्ह्यातील डिगस (ता. कुडाळ) येथे तब्बल १०८ बांगलादेशी नागरिकांनी ऑनलाइन नोंदणी केल्याचा धक्कादायक प्रकार उघड झाला आहे. या प्रकारामुळे प्रशासन खडबडून जागे झाले आहे. जिल्हाधिकारी के. मंजुलक्ष्मी यांनी चौकशीचे आदेश दिले. कुडाळचे प्रांताधिकारी या प्रकरणाची चौकशी करीत आहेत.

पंतप्रधान शेतकरी सन्मान योजनेचा लाभ मिळण्यासाठी लाभार्थ्यांचे बँक खाते आधार संलग्न करणे, ई-केवायसी करणे बंधनकारक करण्यात आले आहे. ही प्रक्रिया पूर्ण झाल्याशिवाय पुढील हप्ता शेतकऱ्यांच्या खात्यात जमा होणार नाही. जिल्ह्यात १ मे २०२३ पासून जिल्हाधिकाऱ्यांच्या नियत्रंणाखाली हे काम सुरू होते.

गावोगावी सध्या या योजनेअंतर्गत ऑनलाइन दाखल अर्जांची पडताळणी सुरू आहे. कुडाळ तालुक्यातील डिगस येथे १०८ बांगलादेशी नागरिकांनी ‘शेतकरी सन्मान’च्या लाभासाठी ऑनलाइन अर्ज केल्याचे उघडकीस आले.

जिल्ह्यात आणखी गावांत असा प्रकार घडला का, याची खातरजमा देखील प्रशासन करीत आहे. या प्रकरणाच्या चौकशी समिती प्रमुखपदी कुडाळचे प्रांताधिकारी आहेत. दोन दिवसांत अहवाल देण्याच्या सूचना जिल्हाधिकाऱ्यांनी केल्या.