हिंगोली ः अतिवृष्टीच्या (Heavy Rainfall) निकषाबाहेरील, परंतु यंदाच्या जून ते ऑगस्ट महिन्यातील सततच्या पावसामुळे झालेल्या पीक नुकसानीबद्दल (Crop Damage) विशेष बाब म्हणून हिंगोली, परभणी जिल्ह्यातील सहा तालुक्यांतील १ लाख ३८ हजार ८९२ बाधित शेतकऱ्यांना वाढीव दराने मदत करण्याकरिता १३५ कोटी ६१ लाख ९ हजार रुपये निधी वितरणास राज्यशासनाने गुरुवारी (ता. १३) काढलेल्या शासन निर्णयाद्वारे मंजुरी दिली आहे.

यंदाच्या पावसाळ्यात जून, जुलै, ऑगस्ट महिन्यात सततच्या पावसामुळे हिंगोली जिल्ह्यातील हिंगोली, कळमनुरी, औंढा नागनाथ, सेनगाव या चार तालुक्यांतील एकूण ९६ हजार ६७७ हेक्टरवरील पिकांचे नुकसानीबद्दल १ लाख ३४ हजार ४०६ शेतकऱ्यांचे नुकसान झाले. परंतु राज्य आपत्ती निवारण बल (एसडीआरएफ) निकषात बसत नसल्यामुळे हे शेतकरी मदतीपासून वंचित होते.

विविध भागांतील शेतकरी आंदोलनानंतर विशेष बाब म्हणून या वंचित बाधित शेतकऱ्यांच्या मदतीसाठी १३२ कोटी १४ लाख ९४ हजार रुपये निधी वितरणास मंजुरी देण्यात आली. त्यात जिरायती क्षेत्रातील ९६ हजार १७८ हेक्टर पिकांच्या नुकसानीबद्दल १३० कोटी ८० लाख २१ हजार रुपये, बागायतील क्षेत्रातील ४९९ हेक्टरवरील पिकांसाठी १ कोटी ३४ लाख ७३ हजार रुपयांचा समावेश आहे.

परभणी जिल्ह्यातील परभणी आणि जिंतूर या दोन तालुक्यांतील २ हजार ५४५.२५ हेक्टरवरील जिरायती पिकांचे नुकसान झालेल्या ४ हजार ४८६ शेतकऱ्यांच्या मदतीसाठी ३ कोटी ४६ लाख १५ हजार रुपये निधी वितरणात मंजुरी देण्यात आली आहे.

जिरायती क्षेत्रातील बाधित शेतकऱ्यांना हेक्टरी १३ हजार ६०० रुपयांनुसार, तर बागायती क्षेत्रातील बाधित शेतकऱ्यांना प्रतिहेक्टरी २७ हजार रुपयांनुसार ३ हेक्टरच्या मर्यादेत मदत दिली जाईल. मदतीची रक्कम बँक खात्यावर जमा केली जाईल.

सततच्या पावसामुळे बाधितांसाठी

मंजूर निधी रक्कम (कोटी रुपये)

तालुका बाधित क्षेत्र शेतकरी संख्या रक्कम

हिंगोली २७०९५ ४९१२६ ३६.८४

कळमनुरी २५३०६ २३८१२ ३५.०८

औंढा नागनाथ २९४५० ४३२०६ ४०.०५

सेनगाव १४८२६ १८२६२ २०.१६

परभणी २१३८ ४१९९ २.९०

जिंतूर ४०७ २८७ ०.५५