पुणे : भारतीय हवामानशास्त्रीय विभागाने आज (ता. ३१) एप्रिल महिन्याचा हवामान अंदाज जाहीर केला. विभागाने (IMD) जाहीर केलेल्या प्रसिद्धीपत्रकानुसार वायव्य आणि मध्य भारतात बहुतांश ठिकाणी तर इशान्य भारतात काही ठिकाणी कमाल तापमान सरासरीपेक्षा जास्त राहण्याची शक्यता आहे. त्यातही विदर्भासहित उत्तर कोकण आणि उत्तर मध्य महाराष्ट्रासाठी एप्रिल महिना चांगलाच उकाड्याचा ठरेल, असे दिसते. तसेच दक्षिण मध्य महाराष्ट्र आणि दक्षिण कोकणात तापमान राज्याच्या इतर भागांच्या तुलनेत कमी राहण्याची चिन्हे आहेत. मार्च ते मे या उन्हाळ्याच्या महिन्यांमध्ये कमाल तापमानाचा पारा सरासरीच्या वर राहण्याची शक्यता विभागाने यापूर्वीच वर्तवली होती.

दुसरीकडे दक्षिण भारतात आणि पूर्व आणि इशान्य भारताच्या बऱ्याच भागांमध्ये कमाल तापमान सरासरीपेक्षा कमी राहू शकते. तर किमान तापमान देशाच्या वायव्य, मध्य, आणि इशान्येकडील राज्यांच्या बहुतांश भागांमध्ये सरासरी ते सरासरीपेक्षा जास्त राहण्याचा हवामानशास्त्र विभागाचा होरा आहे. परिणामी, महाराष्ट्रात दिवसाप्रमाणेच रात्रीही उकाड्याच्या असू शकतात. दक्षिण भारत, मध्य भारताचा पूर्वेकडील भाग, आणि इशान्य भारताचे दक्षिणेकडील भागात किमान तापमान सरासरी ते सरासरीपेक्षा कमी असू शकते.

एकूण देशाचा विचार करता एप्रिलमध्ये देशभरात सरासरीइतका पाऊस पडू शकतो, असे विभागाने म्हटले असून महाराष्ट्रात मात्र पाऊस सरासरीपेक्षा कमी असेल. मुळात एप्रिलमध्ये होणाऱ्या पावसाचे प्रमाण नगण्य असल्याने अगदी काही ठिकाणी हलका पाऊस होऊ शकतो. दरम्यान, राज्यातील काही जिल्ह्यांमध्ये आलेली उष्णतेची लाट कायम राहील, अशी माहिती हवामानशास्त्र विभागाने ट्विट करून दिली आहे.

महासागर जमिनीच्या तुलनेत लवकर थंड अथवा गरम होत नाहीत. त्यामुळे, जगातील सर्वच भूखंडांप्रमाणे भारतीय उपखंडावर महासागरांच्या तापमानाचा कमालीचा प्रभाव पडत असतो. त्यातील प्रशांत महासागरात सध्या असलेली ‘ला निना’ स्थिती भारतीय शेतकऱ्यांसाठी महत्त्वाची ठरते. ही ला निना स्थिती एप्रिलमध्ये कायम राहण्याचे संकेत आहेत. त्यामुळे अमेरिका खंडातील काही देशांमध्ये असलेली दुष्काळी परिस्थिती कायम राहील, असे दिसते. परिणामी, तेथील सोयाबीन आणि मक्यासारख्या पिकांचे उत्पादन कमी होऊन भारतीय शेतमालाच्या दरांना आधार मिळण्याची शक्यता नाकारता येत नाही.