शेती आणि शेतकऱ्यांच्या हितसंबंधांप्रती सरकार कटिबद्ध असल्याचे सांगत केंद्रीय कृषी व शेतकारी कल्याण मंत्री नरेंद्र सिंग तोमर यांनी शेतीसाठी स्वतंत्र अर्थसंकल्पाचा (separate budget) मुद्दा फेटाळून लावला आहे. 

लोकसभेत उपस्थित करण्यात आलेल्या प्रश्नाला उत्तर देताना तोमर यांनी कृषी क्षेत्रासाठी स्वतंत्र अर्थसंकल्प (separate budget) ही संकल्पना शेतकरी, देशाच्या हिताची नसल्याचे स्पष्ट केले आहे. 

लोकसभेत मंगळवारी द्रविड मुन्नेत्र कळघमचे (डीएमके) सदस्य टी. आर. बालू यांनी कृषी क्षेत्रासमोरील प्रश्नांच्या निवारणासाठी स्वतंत्र अर्थसंकल्पाची (separate budget) तरतूद करण्याचा विचार का करत नाही ?  असा सवाल उपस्थित केला. 

हेही वाचा- गावोगावचे शेतकरी मोदींना जाब विचारणार !

 जगभरातील मंदीच्या काळात भारताने केवळ कृषी क्षेत्राच्या जोरावरच तग धरलेला आहे. कृषी क्षेत्राच्या विकासासाठी तामिळनाडू सरकारने कृषी क्षेत्रासाठी स्वतंत्र अर्थसंकल्प (separate budget)  मांडल्याचेही बालू म्हणाले.  

बालू यांनी केलेली सूचना नैसर्गिकपणे स्वागतार्ह वाटू शकते. प्रत्यक्षात शेतीसाठी स्वतंत्र अर्थसंकल्प (separate budget) ही कल्पना देशाच्या आणि शेतकऱ्यांच्याही कामाची नसल्याचे कृषी मंत्री तोमर यांनी म्हटले आहे.  

रेल्वेसाठी आपल्याकडे पूर्वी स्वतंत्र अर्थसंकल्प (separate budget) होता. मात्र केंद्र सरकारने सुधारणा करून रेल्वे अर्थसंकल्पाचा समावेश मुख्य अर्थसंकल्पात केला.

अर्थसंकल्प एक असो वा स्वतंत्र असोत, त्यासाठी वाटचालीची दिशा असायला हवी, संबंधित क्षेत्रासाठी पुरेशा तरतुदी असायला हव्यात आणि त्यांच्या अंमलबजावणीची महत्वाकांक्षा असायला हवी, असेही तोमर यांनी नमूद केले आहे.