पुणे  ः  ग्रामीण आणि दुर्गम भागातील विद्यार्थ्यांना शहरात मिळणारे दर्जेदार शिक्षण देण्यासाठी, त्यांच्याशी थेट संवाद व्हावा या उद्देशाने व्हर्चुअल क्लासरुम संकल्पना राबविण्यात येत आहे. या प्रकल्पाद्वारे ग्रामीण भागातील विद्यार्थ्यांना फायदा होऊन भविष्यातील गुणवंत पिढी तयार होण्यास मदत होईल, असा विश्‍वास शालेय शिक्षण मंत्री प्रा. वर्षा गायकवाड यांनी व्यक्त केला. 

पुण्यातील ई-बालभारतीमध्ये राज्यातील विविध ७२५ शाळांमधील व्हर्च्युअल क्लासरुम प्रकल्पाचे उद्‌घाटन मंत्री गायकवाड यांच्या हस्ते शुक्रवारी (ता. १४) झाले. या वेळी शालेय शिक्षण आयुक्त विशाल सोळंकी, शिक्षण संचालक (प्राथमिक) दत्तात्रय जगताप, माध्यमिक संचालक दिनकर पाटील, सुनील चौहान, शिक्षण मंडळाच्या अध्यक्षा डॉ. शंकुतला काळे, बालभारतीचे संचालक विवेक गोसावी आदि मान्यवर उपस्थित होते. 

या वेळी प्रा. गायकवाड यांनी विद्यार्थी आणि शिक्षकांशी ऑनलाइन संवाद साधला. या वेळी पाचवी इयत्तेमधील कार्तिक चव्हाण (रा. बऱ्हाणपूर, ता. पारनेर), यश बोकीस (दांडेगाव, भुम), वैदेही पवार (खावडी, रत्नागिरी) यांनी मंत्री गायकवाड यांना प्रश्‍न विचारले.  ‘‘शालेय शिक्षणाबरोबरच मैदानात भरपूर खेळा, भरपूर अभ्यास करा. आई-वडिलांवर प्रेम करा. तुम्हीही माझ्यासारखे मंत्री व्हाल. मीपण मराठी शाळेतून शिक्षण घेत, गणिताची शिक्षक झाले. आता शिक्षणमंत्री झाल्याचा आनंद आहे. तुम्हाला चांगले शिक्षण देण्यासाठी मी प्रयत्नशील राहील, असे यावेळी प्रा. गायकवाड म्हणाल्या.