मुंबई  : आपण म्हणजेच देशप्रेमी आणि आपल्याला विरोध करणारे देशद्रोही हा काहींच्या मनातील भ्रमाचा भोपळा मतदारांनी फोडला असून, दिल्लीतील जनतेने ‘मन की बात’ नव्हे तर ‘जन की बात’ आता देशात चालणार हे दाखवून दिल्याची प्रतिक्रिया मुख्यमंत्री उद्धव ठाकरे यांनी दिल्ली विधानसभा निकालानंतर दिली.

यावेळी श्री. ठाकरे म्हणाले, की तथाकथित राष्ट्रीय विचारांच्या सरकारने सर्व ताकद पणाला लावूनही त्यांचा झाडूसमोर टिकाव लागला नाही. बलाढ्य पक्षाने आपले रथी-महारथी निवडणुकीत उतरवून अरविंद केजरीवाल यांची दहशतवाद्यांशी तुलना केली, आंतरराष्ट्रीय विषय आणून मतदारांचे मन विचलित करण्याचा प्रयत्न करूनदेखील अरविंद केजरीवाल यांना ते पराभूत करू शकले नाहीत.