पुणे :  ‘कोरोना’च्या पार्श्वभूमीवर सुरु असलेल्या लॉकडाउनमध्ये शहरातील भाजीपाला पुरवठा सुरळीत राहावा यासाठी सुरु असलेल्या ४ पैकी ३ उपबाजारांमध्ये रविवारी (ता.१९) २७० वाहनांमधून साडेपाच हजार क्विटंल भाजीपाल्याची आवक झाल्याची माहिती पुणे बाजार समितीचे प्रशासक बी.जे.देशमुख यांनी दिली.

गुलटेकडी येथील परिसर संवेदनशील म्हणून जाहीर केल्यानंतर बाजार समितीचे मुख्य आवार बंद आहे. यामुळे फळे, भाजीपाल्याची आवक बंद झाल्याने शेतकऱ्यांच्या शेतमालाला उठाव नसून, शहरात भाजीपाल्याची टंचाई निर्माण होण्याची शक्यता होती. यामुळे शहरालगत असणारे चार उपबाजार सुरु करण्याची परवानगी प्रशासनाने दिली. मात्र खडकी उपबाजार पोलिसांनी बंद केल्याने या ठिकाणी आवक होत नसल्याचे बाजार समितीने कळविले आहे.