मुंबई : रेशनकार्ड उपलब्ध नसणाऱ्या नागरिकांनाही धान्य द्यावे, ‘कोरोना’ विरोधात प्रत्यक्ष लढणाऱ्या डॉक्टर आणि नर्ससाठी महत्त्वाची साधनसामुग्री तत्काळ उपलब्ध करावी आणि तबलिगींसंदर्भात कोणताही धार्मिक अभिनिवेश न बाळगता कारवाई करावी, अशा तीन मागण्या विरोधीपक्ष नेते देवेंद्र फडणवीस यांनी मुख्यमंत्री उद्धव ठाकरे यांच्याकडे पत्राव्दारे केल्या आहेत. 

राज्यातील नागरिकांना रेशनचे धान्य प्राप्त होत नसल्याच्या तक्रारी वारंवार होत आहेत. केंद्र सरकारने तीन महिन्यांचे धान्य रेशनमार्फत देण्याचे स्पष्ट आदेश दिले आहेत. त्यापैकी ९० टक्के कोटा राज्याला प्राप्त झाला असताना वितरणाची व्यवस्था खोळंबली आहे. १६ राज्यांनी रेशनकार्ड नसतानाही धान्य देण्याचा निर्णय घेतला आहे. तीन महिन्यांचे धान्य त्वरित उपलब्ध करून द्यावे. शिधापत्रिका नसल्यास आधार कार्ड प्रमाण मानावे, तेही नसल्यास यादी तयार करून प्रमाणित करावी, अशी मागणी श्री. फडणवीस यांनी केली आहे. मुंबईतील रुग्णालयातील स्थिती आणि प्रत्यक्ष रुग्णांवर उपचार करत असलेले डॉक्टर्स, नर्स आणि आरोग्य कर्मचाऱ्यांच्या सुरक्षेसंदर्भात उपाययोजनांची कमतरता असल्याचे समोर येत आहेत. त्यांनाही ‘कोरोना’ चा संसर्ग होत असल्याने त्वरित निर्णय घेण्याची आवश्यकता श्री. फडणवीस यांनी पत्रातून व्यक्त केली आहे.