सांगली  ः जिल्ह्यात हमीभावाने मका खरेदीसाठी चार खरेदी केंद्रे सुरू करण्यात आली होती. त्यापैकी जत, आटपाडी, आणि तासगाव या तालुक्यांतील खरेदी केंद्रांवर १०३ शेतकऱ्यांनी २०२३ क्विंटल मक्याची विक्री केली असल्याची माहिती जिल्हा पणन विभागाच्या सूत्रांनी दिली.

शासनाने हमीभावापेक्षा कमी दराने शेतीमालाची विक्री होऊ नये आणि किमान आधारभूत किमतीचा लाभ शेतकऱ्यांना मिळावा यासाठी खरेदी केंद्रे सुरू केली आहेत. सध्या जिल्ह्यात मक्याची हमीभावाने खरेदी करण्यासाठी सांगली, आटपाडी, जत, आणि तासगाव या ठिकाणी चार केंद्रे सुरू केली आहेत. मका खरेदीची मर्यादा हेक्टरी २५९१ किलो आहे. त्यामुळे शेतकऱ्यांना दिलासा मिळाला आहे. मक्याला १७६० रुपये क्विंटल असा हमीभाव असल्याने ११८ शेतकऱ्यांनी खरेदी केंद्रांवर मका विक्रीसाठी नोंदणी केली आहे. मका उत्पादकांना खरेदी केंद्रांवर मका विक्रीसाठी येण्याकरिता मोबाईलद्वारे संदेश पाठवण्यात आले आहेत.

सांगली येथील खरेदी केंद्रावर मका विक्रीसाठी नोंदणी झालेली नाही. तासगाव, आटपाडी आणि जत तालुक्यातील केंद्रांवर शेतकरी नोंदणी झाली आहे. आटपाडी तालुक्यातील ६२ शेतकऱ्यांनी १ हजार ११ क्विंटल, जत तालुक्यातील २१ शेतकऱ्यांनी ६४८, तर तासगाव तालुक्यातील २० शेतकऱ्यांनी  ३६४ क्विंटल मक्याची खरेदी केंद्रांवर विक्री केली आहे. अजून १५ शेतकऱ्यांनी मक्याची विक्री केलेली नाही. खरेदी केंद्रांवर मका विक्रीची हमीभावाप्रमाणे ३५ लाख ६० हजार ४८० रुपये इतकी रक्कम झाली आहे. ही रक्कम शेतकऱ्यांच्या खात्यावर अदा करण्यासाठी त्याचा प्रस्ताव वरिष्ठ विभागाकडे सादर करण्यात आला आहे. तो प्रस्ताव मंजूर झाल्यानंतर शेतकऱ्यांच्या खात्यावर रक्कम वर्ग केली जाईल.