सोलापूर  ः शहर हद्दीतील कार्यालये वगळता ग्रामीण भागातील जमीन खरेदी-विक्री नोंदणीसाठी उपनिबंधक कार्यालये सुरू करण्याचे आदेश जिल्हाधिकारी मिलिंद शंभरकर यांनी काढले आहेत. त्यामुळे दक्षिण सोलापूर व उत्तर सोलापूर वगळता इतर सर्व तालुक्यातील कार्यालयातून जागा, जमीन खरेदी-विक्री करण्यास परवानगी देण्यात आली आहे.

जिल्ह्यातील प्रामुख्याने पंढरपूर, बार्शी, करमाळा, माढा, मोहोळ, माळशिरस, सांगोला, मंगळवेढा व अक्कलकोट या तालुक्यातील खरेदी-विक्री कार्यालये सुरू होतील. असे असले तरी लॅाकडाउनमुळे लोकांना या कार्यालयापर्यंत पोचणे शक्य आहे का, ते कशाने प्रवास करणार, हा प्रश्न आहे. प्रत्येक कार्यालयात कर्मचारी व नागरिकांमध्ये सुरक्षित अंतर राहिल, याची विभागप्रमुखांकडून काळजी घ्यावी, सॅनिटायझर, मास्कचा वापर करणे बंधनकारक असल्याचे आदेशात नमूद केले आहे.

परंतु सार्वजनिक वाहतूक सेवा बंद आहे. खरेदी-विक्री करणारे बॉण्डरायटर, संबंधित कर्मचारी यांच्यासाठी आदेशात परवानगी असल्याचे नमूद नाही. खरेदी-विक्रीच्या व्यवहारासाठी नागरिकांना पोलिसांकडून परवानगी दिली जाणार का? खरेदी-विक्रीसाठी पास काढावे लागणार का? यावरही जिल्हा प्रशासनाकडून काहीच स्पष्ट करण्यात आले नाही. त्यामुळे कार्यालये सुरू केली तरी नागरिकांकडून कितपत प्रतिसाद मिळेल, याबाबत साशंकता आहे.