नागपूर  : भौगोलिक मानांकन मिळालेल्या आणि आपल्या गुणवैशिष्ट्यांमुळे नावलौकिक प्राप्त असलेल्या भिवापुरी मिरचीचा दर्जा आणि उत्पादकता वाढीसाठी प्रयत्न होण्याची गरज आहे, असे मत कृषिमंत्री दादा भुसे यांनी व्यक्त केले. कृषी विद्यापीठाने या अनुषंगाने संशोधनात पुढाकार घ्यावा, अशी अपेक्षा त्यांनी व्यक्त केली.

‘कृषी संजीवनी सप्ताहा’निमित्त कृषिमंत्री भुसे यांनी उमरेड व भिवापूर तालुक्यातील विविध शेतकऱ्यांच्या बांधावर जाऊन संवाद साधला. या वेळी ते बोलत होते. उमरेडचे आमदार राजू पारवे, विभागीय कृषी सहसंचालक रवींद्र भोसले, जिल्हा अधीक्षक कृषी अधिकारी मिलिंद शेंडे, उपविभागीय कृषी अधिकारी पी. एन. डाखडे, उमरेडचे तालुका कृषी अधिकारी संजय वाकडे, भिवापूरचे राजेश जारोंडे उपस्थित होते.

उदासा येथील प्रवीण वंजारी या युवा शेतकऱ्याने पारंपरिक शेतीला फाटा दिला आहे. त्यांनी योजनांमधून शेडनेट उभारले असून, त्या माध्यमातून भाजीपालावर्गीय पिके, फळांची रोपे तयार करून ते शेतकऱ्यांना विक्री करत आहेत. त्यातून चांगले उत्पन्न मिळत असल्याचे वंजारी यांनी सांगितले. उमरेडलगत अरविंद गिरडकर यांच्या शेतात धान पऱ्हे रोवणी सुरू असताना कृषिमंत्री भुसे यांनी त्याची पाहणी केली.

त्या वेळी उपस्थित महिला शेतमजुरांसोबत धानलावणी, त्यांची मजुरी, कामाच्या वेळांबाबत चर्चा केली. भिवापूर येथील नसीर मलिक यांच्या मिरची सफाई, काटणी केंद्राला भुसे यांनी भेट दिली. भिवापुरी मिरचीला भौगोलिक मानांकन मिळवून देण्यासाठी प्रयत्न केल्याबद्दल डॉ. नारायण लांबट यांचा कृषिमंत्र्यांनी सत्कार केला.