नगर  ः दूध उत्पादकांच्या विविध मागण्यांसाठी आज (शनिवारी) राज्यभर गावोगावी चावड्यांसमोर दुधाचा अभिषेक घालत आंदोलन करण्यात येणार आहे. त्यात राज्यभरातील दूध उत्पादकांनी सहभागी व्हावे, असे आवाहन किसान सभा व दूध उत्पादक शेतकरी संघर्ष समितीने केले आहे.  

किसान सभेचे नेते डॉ.अशोक ढवळे, जे.पी.गावीत, किसन गुजर, अर्जुन आडे, उमेश देशमुख, डॉ.अजित नवले यांनी सांगितले, की दूध दराबाबत विविध मागण्यांसाठी किसान सभा, दूध उत्पादक शेतकरी संघर्ष समिती व समविचारी संघटनांच्या वतीने २० जुलै पासून राज्यात आंदोलन सुरू आहे. आंदोलनाचा दुसरा टप्पा आजपासून सुरू होत आहे. यावेळी राज्यभर गावोगावी चावडीवर दुग्धाभिषेक घालत व निदर्शने करीत हे आंदोलन तीव्र केले जाणार आहे. 

लॉकडाउनपूर्वी राज्यातील शेतकऱ्यांना दुधाला ३० ते ३५ रुपये दर मिळत होता. मात्र लॉकडाउनमुळे दूधाला मागणी घटल्याने गायीच्या दुधाचे भाव १७ रुपयांपर्यंत खाली कोसळले. शेतकऱ्यांना अशा संकटात मदत व्हावी या उद्देशाने राज्य सरकारने प्रतिदिन १० लाख लिटर दूध खरेदी करण्याचा निर्णय घेतला. शेतकऱ्यांना या योजनेद्वारे किमान २५ रुपये दराची हमी देण्यात आली. प्रत्यक्षात मात्र ही योजना केवळ सहकारी दूध संघांनाच लागू करण्यात आली.

राज्यातील ७६ टक्के दूध संकलित करणाऱ्या खाजगी दूध कंपन्यांना यातून वगळण्यात आले. परिणामी सरकार प्रतिदिन दहा लाख लिटर दूध खरेदी करू शकले नाही. शेतकऱ्यांना यामुळे पुरेसा दिलासा मिळाला नाही. योजना सुरू असतानाही दुधाचे खरेदी दर यामुळे १७ रुपयांपर्यंत खाली आले. राज्य सरकारने या पार्श्वभूमीवर आता दूध विकत घेण्याऐवजी किंवा कंपन्यांना अनुदान देण्याऐवजी सरळ शेतकऱ्यांना मदत करावी, अशी मागणी करण्यात आली आहे.    या आहेत प्रमुख मागण्या