चालू रब्बी हंगामात मोहरीचे (Mustard Production) विक्रमी ११३ लाख टन उत्पादन होण्याचा अंदाज सेंट्रल ऑर्गनायझेशन फॉर ऑइल इंडस्ट्री अँड ट्रेड (Central Organisation For Oil Industry And Trade ) म्हणजेच सीओओआयटी (COOIT) या संस्थने वर्तविला आहे. मागील महिन्यात संस्थेने ११० लाख टन मोहरी उत्पादनाचा अंदाज व्यक्त केला होता. बिझनेस लाईनने यासंदर्भातील वृत्त दिले आहे.

हेही वाचा - टुटाच्या विळख्यात टोमॅटो उत्पादक शेतकरी   दोन दिवसीय वार्षिक परिषदेच्या शेवटच्या दिवशी संस्थेने राज्य निहाय उत्पादनाचा (State wise Mustard Production) अंदाज जाहीर केला. यावर्षी ९१ लाख हेक्टर क्षेत्रात मोहरी लागवड करण्यात आली असून ११४.६ लाख टन मोहरी उत्पादन होईल, असा अंदाज केंद्रीय कृषी मंत्रालयाने वर्तविला आहे. मात्र यावर्षी मोहरीचे एकूण उत्पादन ११३ लाख टन राहील, असे सीओओआयटीने म्हटले आहे. सरकारी अंदाजानुसार, उत्तर प्रदेशात मोहरी प्रकारातील टोरियाखालील क्षेत्र चार लाख हेक्टर आहे.  

हेही वाचा - येवल्यातील नऊ गावांत अवकाळीचा पिकांना फटका

या अंदाजानुसार, राजस्थानमध्ये मोहरी उत्पादन ५१ लाख टन होण्याची शक्यता आहे. त्या पाठोपाठ उत्तर प्रदेशात १७ लाख टन, तर मध्य प्रदेशात १२.५ लाख टन उत्पादन होण्याची शक्यता आहे.

यावेळी आयसीएआरच्या मोहरी संशोधन विभागाचे संचालक पी. के राय म्हणाले की, “उत्पादनातील तफावत कमी झाल्यास भारतातील मोहरीचे उत्पादन ३०-३५ टक्क्यांनी वाढू शकते. मोहरी उत्पादन वाढीसाठी मोहरी तेल उद्योग क्षेत्रातील प्रतिनिधी, शेतकरी, संशोधकी आणि मोहरी संशोधन विभागातील कर्मचाऱ्यांच्या सहभागातून एक विशेष कृती गट स्थापन करण्याचे आवाहन राय यांनी केले आहे. हवामान बदल,वेळेवर बियाणे न मिळणे, उत्पादन तंत्रज्ञानाच्या अभाव अशा अनेक कारणांमुळे उत्पादन कमी होते.

पश्चिम बंगाल, आसाम आणि ओडिशा या पूर्वेकडील राज्यांमधील प्रति हेक्टर ०.७४-०.७९ टन उत्पादकतेच्या तुलनेत राजस्थानमध्ये उत्पादकता प्रति हेक्टर १.४६ टन असण्याची शक्यता सीओओआयटीने व्यक्त केली आहे.