औरंगाबाद : साधारण उंची आणि वजनाचे बैल पाहणाऱ्या सर्वांसाठी तब्बल एक टन वजनाचा गज्या नावाचा बैल सकाळ ॲग्रोवन तर्फे आयोजित कृषी प्रदर्शनातील मुख्य आकर्षण ठरला आहे. प्रदर्शनाला भेट देणारी प्रत्येक व्यक्ती गज्याला पाहायल्याशिवाय घरी जात नाही हे विशेष. 

कसबे डिग्रज (जि. सांगली) येथील कृष्णा यशवंत सायमोते यांच्या मालकीचा हा बैल आहे. त्याचा जन्म एक ऑक्टोबर २०११ चा आहे. त्याचे मालक सायमोते म्हणाले, की देशी आणि जर्सी वंशाच्या संकरातून गज्याचा जन्म झाला आहे. जवळपास आठ वर्षे वय असलेल्या गज्याची बालपणापासूनच विशेष काळजी घेतली जात आहे. त्याची उंची सहा फूट तर लांबी १० फूट आहे.  त्याचा एकूणच आकार सर्वसाधारण बैलासारखा नाही. त्यामुळे इतर सर्वसाधारण बैलांना गज्याची जोड शक्य नाही. त्यामुळे त्याचा क्वचित प्रसंगी एकबैली गाडीसाठी वापर केला जातो. गज्याला पाहणा-यांची संख्या मोठी असल्याने त्याला विविध ठिकाणी आयोजित करण्यात येत असलेल्या प्रदर्शनांमध्ये मोठी मागणी असते. प्रत्येक ठिकाणी तो सर्वांच्या कुतूहलाचा आणि आकर्षणाचा केंद्रबिंदू ठरला आहे. सकाळ अॅग्रोवन कृषी प्रदर्शनामध्ये पहिल्याच दिवशी जवळपास २ हजार व्यक्तींनी गज्याला प्रत्यक्ष पाहण्याचा आनंद लुटला. दुस-या दिवशीही गज्या ला पाहणा-यांची रिघ सुरूच होती.  दहा फूट लांब आणि ६ फूट उंच बैल..! पहा video..