जळगाव ः भडगाव, जळगाव, पाचोरा भागांतील अनेक गावांमध्ये मंगळवारी (ता. ११) सायंकाळी वादळासह हलका पाऊस झाला. यामुळे अनेक गावांमध्ये घरांचे व शिवारात केळी, लिंबू बागांचे नुकसान झाल्याची माहिती आहे. यासंदर्भात बुधवारी (ता. १२) सकाळीच पंचनाम्यांची कार्यवाही सुरू झाली.  वादळात अनेक गावांमध्ये घरांचे पत्रे उडून नुकसान झाले आहे. तर भडगाव तालुक्‍यातील बोदर्डे, निंभोरा, पिचर्डे, कनाशी, कोठली, बात्सर, लोणपिराचे, खेडगाव या भागात केळी, लिंबू बागांचे नुकसान झाले. बात्सर येथे गिरणा नदीकाठच्या केळी बागांमध्ये अनेक शेतकऱ्यांचे ३० ते ४० टक्‍क्‍यांवर नुकसान झाले आहे. जळगाव तालुक्‍यातील दापोरा, धानोरा, मोहाडी भागांतील नवती केळी बागांमध्ये केळीची झाडे जमीनदोस्त झाली.  या नुकसानीची माहिती पालकमंत्री गिरीश महाजन यांना मिळाल्यानंतर त्यांनी जिल्हाधिकारी डॉ. अविनाश ढाकणे यांच्याशी लागलीच दूरध्वनीवरून संपर्क साधला व पंचनामे तातडीने करण्याचे आदेश दिले. जिल्हाधिकारी यांनी यासंदर्भात पाचोरा विभागाचे प्रांत राजेंद्र कचरे यांना सूचना देऊन पंचनामे तातडीने करून त्याची माहिती बुधवारी सायंकाळपर्यंत मागितली आहे. अहवाल आल्यानंतर नुकसानग्रस्त शेतकऱ्यांना भरपाई दिली जाईल, असे प्रशासनाने म्हटले आहे.