परभणी ः जिल्ह्यात या वर्षीच्या (२०२१) खरीप हंगामात गुरुवार (ता.९) पर्यंत विविध बॅंकांनी ९६ हजार ९३६ शेतकऱ्यांना ६५२ कोटी २८ लाख रुपये म्हणजेच उद्दिष्टाच्या ५३.७६ टक्के पीककर्ज वाटप केले आहे. जिल्हा बॅंकेपाठोपाठ महाराष्ट्र ग्रामीण बॅंकेने देखील उद्दिष्टपूर्ती केली आहे. राष्ट्रीयीकृत बॅंकांचे कर्जवाटप अद्याप ४० टक्केच्या आत, तर खासगी बॅंकांचे २५ टक्केच्या आत रखडले आहे.

जिल्ह्यातील राष्ट्रीयीकृत बॅंकांना ७८१  कोटी ५८ लाख रुपये, खासगी बॅंकांना १०१ कोटी १८ लाख रुपये, महाराष्ट्र ग्रामीण बॅंकेला १८७ कोटी ६३ लाख रुपये, जिल्हा बॅंकेला १४२ कोटी ८३ लाख रुपये पीककर्ज वाटपाचे उद्दिष्ट आहे. राष्ट्रीयीकृत बॅंकांनी आजवर २८ हजार ४८ शेतकऱ्यांना २७६ कोटी २२ लाख रुपये (३५.३४ टक्के), खासगी बॅंकांनी १ हजार ७५२  शेतकऱ्यांना २० कोटी ६० लाख रुपये (२०.३६ टक्के), महाराष्ट्र ग्रामीण बॅंकेने २३ हजार ६१५ शेतकऱ्यांना १९८ कोटी  ९१ लाख रुपये १०६.०१ टक्के), जिल्हा बॅंकेने ४३ हजार ५२१ शेतकऱ्यांना १०९.६१ टक्के पीक कर्जवाटप केले. 

सर्व बॅंकांनी मिळून २४ हजार ९१९ शेतकऱ्यांना २३५  कोटी ४३ लाख रुपयांचे नवीन पीक कर्जवाटप केले आहे. एकूण ७२  हजार १७ शेतकऱ्यांनी ४१६ कोटी ८५ लाख रुपयांच्या पीककर्जाचे नूतनीकरण केले. जिल्हा बॅंकेने उद्दिष्टापेक्षा जास्त वाटप केले असले, तरी एकाही नवीन शेतकऱ्यांस कर्ज दिलेले नाही. जिल्हाधिकारी आंचल गोयल यांनी सुट्टीच्या दिवशी कामकाज करत रविवार (ता.२२ ऑगस्ट) पर्यंत उद्दिष्ट पूर्ण करण्याचे निर्देश दिले होते. परंतु राष्ट्रीयीकृत आणि खासगी बॅंकांनी त्याकडे दुर्लक्ष केल्याचे दिसत आहे.