मुंबई : राज्य विधिमंडळाचे हिवाळी अधिवेशन येत्या ११ डिसेंबरपासून सुरू होत असल्याची माहिती संसदीय कामकाजमंत्री गिरीश बापट यांनी दिली. कामकाज सल्लागार समितीच्या बैठकीनंतर विधान भवनात ते पत्रकारांशी बोलत होते.

बापट म्हणाले, की कामकाज सल्लागार समितीने सध्या ११ ते २२ डिसेंबरपर्यंतचे कामकाज निश्चित केले आहे. या काळात प्रलंबित १३ विधेयके आणि नवीन अकरा अध्यादेश विधिमंडळात मांडले जाणार आहेत. २० तारखेला कामकाज सल्लागार समितीची पुन्हा बैठक घेतली जाणार आहे. या बैठकीत अधिवेशनाचा कालावधी वाढवण्यावर विचार करून निर्णय घेतला जाणार आहे. कामकाज शिल्लक राहिले असेल तर कालावधी वाढवला जाईल.

विरोधकांनी अधिवेशनाचा कालावधी वाढवण्याची मागणी केली आहे. यापूर्वी विरोधात असताना आपणही अधिवेशनाचा कालावधी वाढवण्याची मागणी करत होता, याकडे लक्ष वेधले असता बापट म्हणाले, त्या वेळी जनतेचे प्रश्न मांडून आम्ही सभागृहाचे कामकाज करीत होतो. गोंधळ करून कामकाज बंद पाडत नव्हतो. दुर्दैवाने आता तसे होत नाही. राज्य सरकार सर्व मुद्द्यांवर चर्चेला तयार आहे. विरोधकांनी कामकाजात सहभाग घ्यावा, विरोधकांनी सहकार्य केल्यास कामकाज सुरळीत पार पडेल, असे आवाहनही त्यांनी या वेळी केले.