पुणे : मॉन्सून दाखल झाल्यानंतर राज्यात जोरदार पावसाची प्रतीक्षा आहे. मृग नक्षत्र संपून सूर्याचा आज (शनिवार) आर्द्रा नक्षत्रात प्रवेश होणार आहे. यातच आजपासून (ता. २२) कोकण, मध्य महाराष्ट्र आणि मराठवाड्यात जोरदार पावसाची शक्यता हवामान विभागाने वर्तविली आहे. मराठवाड्यात मुसळधारेचा अंदाज असून, सतर्कतेसाठी ‘ऑरेंज अलर्ट’, तर कोकण, मध्य महाराष्ट्रात जोरदार पावसाचा ‘यलो अलर्ट’ देण्यात आला आहे. 

यंदा मॉन्सूनचे आगमन खूपच लांबल्याने दुष्काळाने होरपळणाऱ्या महाराष्ट्राला चांगल्या पावसाची ओढ लागली आहे. गुरुवारी (ता. २०) मॉन्सून कोकणात दाखल झाला, दक्षिण कोकणात पावसाने दणक्यात सुरवात केली. शुक्रवारी मॉन्सूनने प्रगती केली असली तरी उर्वरित राज्यात अद्याप तरी पावसाने जोर धरला नसल्याचे चित्र आहे. उद्यापर्यंत राज्यात पाऊस जोर धरण्याची शक्यता हवामान विभागाने वर्तविली आहे. तर विदर्भात हलक्या पावसाचा अंदाज आहे. शुक्रवारी सकाळपर्यंतच्या २४ तासांमध्ये कोकण, मध्य महाराष्ट्र, पूर्व विदर्भात तुरळक ठिकाणी हलक्या ते जोरदार पावसाने हजेरी लावली. पावसाला पोषक हवामान होत असल्याने तापमानातही घट होण्यास सुरवात झाली आहे. 

शुक्रवारी (ता. २१) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये स्रोत : कृषी विभाग) ः कोकण : कोंडगाव २८, देवली २५, देवरूख ८८, सवंडल २१, कुंभवडे ३४, पाचल २३, भांबेड ३०, विलवडे २१, देवगड २८, पडेल ४९, मीतबंब ५२, मासुरी ३६, अंबेरी २४, पोइप २२, आजगाव २३, मदुरा ४९, शिरोडा २०. मध्य महाराष्ट्र : लामज १९, करंजे १२, खरसुंडी २५, शिरोळ १२, जयसिंगपूर १४, करंजफेन १५, कागल १२.विदर्भ : धाबा २२, तेमुर्डा २६, शेगाव ३९, चिकनी ५४, कोपर्णा २०, बल्लारपूर २४, पोंभुर्णा ५२, पाटण ४६, गडचिरोली २४, आरमोरी ३४, पिसेवढथा ४५, येनापूर २०, सिरोंचा २३, अल्लापाल्ली ३३, एटापल्ली ५४, मुरूमगाव ३८, चाटेगाव २०.