जळगाव : जिल्ह्यात गेल्या दोन दिवसांत अनेक धरणांच्या लाभक्षेत्रात पाऊस झाला आहे. गिरणा धरणातील साठाही वाढत आहे. तसेच तापी नदीवरील हतनूर धरणातही पाण्याची आवक वाढली आहे. यामुळे नदीकाठच्या गावांना सतर्कतेचा इशारा देण्यात आला आहे. पावसामुळे पिकांची स्थिती बिकट बनत आहे. परंतु, धरणांमधील जलसाठा वाढत आहे.

चाळीसाव व नाशिक जिल्ह्याच्या सिमेनजीकच्या गिरणा धरणातील जलसाठा गेल्या दोन दिवसांत वाढला आहे. तो शुक्रवारी (ता.११) दुपारी ९० टक्क्यांपर्यंत पोचला. गिरणा धरणाची एकूण साठवण क्षमता १८.४८ टीएमसी आहे. त्यात सुमारे १७ टीएमसी एवढा जलसाठा झाला आहे. या धरणातील जलसाठा १००  टक्के होऊ शकतो, असा अंदाज आहे. या धरणामुळे जळगाव जिल्ह्यातील पाच तालुक्यांमधील सुमारे २१ हजार हेक्टर क्षेत्राला रब्बी हंगामात सिंचनासाठी लाभ होतो. 

जामनेर तालुक्यातील वाघूर धरण १०० टक्के भरले आहे. त्यातून विसर्ग सुरू असून, वाघूर नदीला पूरस्थिती आहे. वाघूरमुळे जामनेर, भुसावळ व जळगाव या तालुक्यांना लाभ होतो. वाघूर धरणाची साठवण क्षमता ८.७६ टीएमसी एवढी आहे. तापी नदीवरील भुसावळनजीकच्या हतनूर धरणातील साठा सतत वाढत आहे. त्यात गुरुवारी (ता.१०) सकाळी ७९ टक्के जलसाठा होता. परंतु, धरणाचे लाभक्षेत्र असलेल्या सातपुडा पर्वत, मध्य प्रदेशमधील बैतुल व इतर भागात गेल्या दोन दिवसांत जोरदार पाऊस झाला आहे. यामुळे धरणाची पाणीपातळी वाढली. 

धरणाची धोकापूर्व पातळी २१३ मीटर एवढी आहे. गुरुवारच्या जोरदार पावसात धरणाची पातळी २३१.०८ मीटर एवढी झाली. यामुळे पाण्याचा अतिवेगवान विसर्ग तातडीने सुरू करावा लागला. शुक्रवारी धरणाचे १२ दरवाजे उघडण्यात आले. कुठल्याही वेळी विसर्ग सुरू होऊ शकतो. तापी नदीला यंदा तिसऱ्यांचा चांगला पूर आला आहे.