परभणी : खरीप हंगामातील सोयाबीन काढणीच्या, कापूस वेचणीच्या अवस्थेत आहे. सतत हलका ते मुसळधार पाऊस सुरु आहे. त्यामुळे हंगाम वाया जाण्याची चिन्हे दिसू लागली आहेत.

दरम्यान, रविवारी (ता.२०) सकाळी आठ पर्यंतच्या २४ तासांत परभणी, हिंगोली जिल्ह्यातील ६३ मंडळांत हलका ते मुसळधार पाऊस झाला. परभणी जिल्ह्यातील दोन आणि हिंगोली जिल्ह्यातील एका मंडळांमध्ये अतिवृष्टी झाली.

परभणी जिल्ह्यातील ३५ मंडळांत ध्यम ते मुसळधार पाऊस झाला. जिंतूर तालुक्यातील सावंगी म्हाळसा (७२.८ मिमी) आणि पाथरी (७७ मिमी) या दोन मंडळांत अतिवृष्टी झाली.

परभणी, जिंतूर, सेलू,  मानवत, पाथरी, सोनपेठ, गंगाखेड, पालम, पूर्णा तालुक्यातील बहुतांश मंडळांत मध्यम ते जोरदार पाऊस झाला. मुसळधार पावसामुळे करपरा, दुधना, इंद्रायणी, पूर्णा नद्या तसेच ओढे, नाल्यांच्या पुराचे पाणी शेतातील पिकांमध्ये शिरले. त्यामुळे पिके आडवी झाली. जिंतूर तालुक्यात करपरा नदी, परभणी तालुक्यात इंद्रायणी नदी, पूर्णा तालुक्यात ओढे, नाले भरले आहेत. पूर्णा नदीच्या पाण्यामुळे सोयाबीन, कपाशी, तूर आदीसह भाजीपाला, फळे, पिकांची मोठी हानी झाली आहे.

हिंगोली जिल्ह्यातील २८ मंडळांत हलका ते जोरदार पाऊस झाला. हिंगोली, वसमत तालुक्यातील अनेक मंडळांमध्ये जोरदार पाऊसझाला. औंढा नागनाथ तालुक्यातील जवळा बाजार मंडळांमध्ये अतिवृष्टी झाली. दोन दिवसापूर्वी कुरुंदा, गिरगाव मंडळांत ढगफुटी झाली. त्यामुळे शेकडो हेक्टरवरील सोयाबीन, तूर, कापूस आदी फळे, भाजीपाला पिकांचे अतोनात नुकसान झाले.

मंडळनिहाय पाऊस (मि.मी)

परभणी जिल्हा ः परभणी शहर ५२.५, पेडगाव ४३.८,सावंगी म्हाळसा ७२.८, बामणी ३५,  बोरी ३२.७, कोल्हा ५३.३ पाथरी ७७.३, बाभळगाव ४६, पालम ४३.५, बनवस २७.८, पूर्णा२०.८, ताडकळस ११.४, लिमला ११.४, कात्नेश्वर १२.८.

हिंगोली जिल्हा ःसिरसम ११.३, डिग्रस १९.८, वसमत २९, हट्टा ३६.३, टेंभुर्णी १६.३, औंढानागनाथ ३५.३, येळेगाव १४.८,साळणा १८, जवळा बाजार ७३.३.