अकोला : वऱ्हाडातील तीन जिल्ह्यांत शासकीय हमीभावाने सुरू असलेल्या खरेदी केंद्रांवरील तूर खरेदी दोन लाख क्विंटलपर्यंत पोचली अाहे. साधारणतः महिनाभरात महाराष्ट्र राज्य को-अाॅप मार्केटिंग फेडरेशन व विदर्भ को-अाॅप मार्केटिंग फेडरेशनच्या माध्यमातून सुुरू असलेल्या केंद्रांवर ही खरेदी करण्यात अाली अाहे.
बऱ्याच प्रतीक्षेनंतर या हंगामात फेब्रुवारीत तूर खरेदी केंद्र सुरू करण्यात अाले. यात अाॅनलाइन नोंदणी करून शेतकऱ्यांना मेसेज देत केंद्रावर तूर विक्रीसाठी अाणण्याची सूचना केली जात अाहे. त्यामुळे यावर्षी कुठल्याच केंद्रावर रांगा लागल्या किंवा गोंधळ उडाला असे अद्यापपर्यंत झालेले नाही. खरेदी प्रक्रीया झाल्यानंतर चुकारे थेट शेतकऱ्यांच्या बँक खात्यात वर्ग केले जाणार अाहेत. या हंगामात तुरीला ५२५० रुपये दर व २०० रुपये बोनस असा ५४५० रुपये क्विंटल हमीभाव जाहीर झालेला अाहे.
फेब्रुवारीच्या पहिल्या अाठवड्यात तूर खरेदीसाठी ठिकठिकाणी केंद्र सुरू करण्यात अाले. विदर्भ मार्केटिंग फेडरेशन व महाराष्ट्र मार्केटिंग फेडरेशन यांच्या केंद्रावर अातापर्यंत साधारण महिनाभराच्या कालावधीत तूर खरेदीत बुलडाणा जिल्ह्याने अाघाडी घेतली. या जिल्हयात एक लाख १५ हजार क्विंटलपेक्षा अधिक तूर अातापर्यंत खरेदी झाली अाहे.
त्यानंतर अकोला जिल्ह्यात ५२ हजार ५०० अाणि वाशीम जिल्ह्यात २९ हजार ५४१ क्विंटल तूर खरेदी करण्यात अालेली अाहे. सर्व केंद्रांवर एक लाख ९८ हजार क्विंटलपेक्षा अधिक खरेदी झाली असून या तुरीची किंमत १०८ कोटी १५ लाख रुपये अाहे. या महिन्यात तुरी खरेदीत आणखी वाढ होणार अाहे. मात्र उत्पादन कमी असल्याने गेल्यावर्षीप्रमाणे अाकडे गाठले जातील हे सांगणे कठीण अाहे.
येथे आहेत तूर खरेदी केंद्रे : महाराष्ट्र स्टेट को-अाॅप मार्केटिंग फेडरेशन ः अकोला, तेल्हारा, बार्शिटाकळी, पातूर, वाडेगाव, पारस, रिसोड, मालेगाव, मानोरा, वाशीम, शेगाव, देऊळगावराजा, चिखली, संग्रामपूर, मेहकर, बुलडाणा, मोताळा, लोणार.
विदर्भ को-अाॅप मार्केटिंग फेडरेशन ः अकोट, मूर्तिजापूर, मलकापूर, खामगाव, जळगाव जामोद, नांदुरा, चिखली, कारंजा, मंगरुळपीर.