नवी दिल्ली : केंद्र सरकारच्या तीन नवीन कृषी कायद्यांच्या विरोधातील आंदोलन बुधवारी (ता. १७) ८४ व्या दिवशी सुरू होते. गाझीपूर सीमेवर आंदोलकांनी त्यांच्या सोयीसाठी सीसीटीव्ही कॅमेरे आणि तात्पुरती शौचालये उभारली आहेत.  एएनआयशी बोलताना आंदोलक दिनेश शर्मा म्हणाले, ‘‘पंतप्रधान नरेंद्र मोदी यांच्या स्वच्छ भारत मिशनच पूर्तता करण्यासाठी शौचालयांची उभारणी केली आहे.आमचे पंतप्रधान नेहमीच स्वच्छतेबद्दल बोलत असतात, म्हणून शेतकरी म्हणून आम्ही गाझीपूर सीमेवर स्वच्छता राखण्यासाठी सर्व खबरदारी घेत आहोत. त्यासाठी येथे शौचालयेही बसविली आहेत. मागील काळात काही गुंडांनी आंदोलन करणाऱ्या शेतकऱ्यांशी गैरवर्तन केले होते, म्हणूनच भविष्यात अशी घटना होऊ नये म्हणून आंदोलनस्थळावर सीसीटीव्ही कॅमेरे बसविण्यात आले आहेत.’’ 

सीमेवरही भाजीपाला पिकविण्याचा विचार  ‘‘सीमेवर दोन्ही बाजूंनी भाजीपाला पिकविण्यासाठी जमीन आहे. सरकारशी आमचा दीर्घकाळ चालणारा लढा आहे, म्हणून आम्ही येथे बराच काळ थांबू. लांबच्या लढाईसाठी ठोस तयारी करावी लागणार आहे. आजूबाजूची जमीन साफ करून शेतीसाठी योग्य करून भाजीपाला पिकविण्याचा विचार आहे. सरकार त्यांना पाहिजे तितका वेळ घेऊ शकते. पण शेतकरी त्यांचा हक्क घेतल्याशिवाय जाणार नाहीत, हे आम्ही स्पष्ट करू इच्छितो, ’’ असेही दिनेश शर्मा म्हणाले. आणखी एक आंदोलक वीरेंदर सिंग यांनीही असेच मत व्यक्त केले.