हिंगोली : ‘‘जिल्ह्यात जलयुक्त शिवार अभियानांतर्गत पूर्ण झालेल्या कामांमुळे ४२ हजार टीसीएम पाणीसाठा निर्माण झाला आहे. त्यामुळे जिल्ह्यात ८४ हजार हेक्टर संरक्षित सिंचन क्षेत्र निर्माण झाले आहे,’’ असे प्रतिपादन पालकमंत्री अतुल सावे यांनी केले.

जिल्हाधिकारी कार्यालयात आयोजित स्वातंत्र्य दिनाच्या मुख्य शासकीय कार्यक्रमामध्ये गुरुवारी (ता. १५) सावे बोलत होते. या वेळी जिल्हा परिषदेच्या अध्यक्षा शिवराणी नरवाडे, खासदार हेमंत पाटील, आमदार सर्वश्री मुटकुळे, जिल्हाधिकारी रुचेश जयवंशी, जिल्हा परिषदेचे मुख्य कार्यकारी अधिकारी एच. पी. तुम्मोड, पोलिस अधीक्षक योगेश कुमार, अप्पर जिल्हाधिकारी जगदीश मनियार, निवासी उपजिल्हाधिकारी चंद्रकांत सूर्यवंशी यांची प्रमुख उपस्थिती होती.

सावे म्हणाले, ‘‘जिल्ह्यातील २ लाख ८२ हजार शेतकऱ्यांनी २ लाख ३५ हेक्टरवरील पिकांसाठी सुमारे ९० कोटी रुपयांचा पीकविमा उतरविला आहे. छत्रपती शिवाजी महाराज शेतकरी सन्मान योजनेअंतर्गत जिल्ह्यातील ६६ हजारहून अधिक शेतकऱ्यांना २६७ कोटी रुपयांची कर्जमाफी झाली आहे. या अभियानामुळे जिल्ह्यातील प्रत्येक गावात शाश्वत पाणी आणि शेतीकरिता सिंचनाची सोय उपलब्ध झाली आहे. २०१६ ते २०१९ या कालावधीत एकूण ४१९ गावांची निवड झाली.’’

‘‘मागेल त्याला शेततळे योजनेअंतर्गत ३ हजार ५५७ शेततळे पूर्ण करून उद्दिष्टपूर्ती केली. कर्मवीर दादासाहेब गायकवाड सबलीकरण व स्वाभिमान योजनेतंर्गत ११ अनुसूचित जातीच्या लाभार्थ्यांना ४३ एकर शेतीचे वितरण करण्यात आले. राज्यातील कोल्हापूर सांगलीसह पाच जिल्ह्यांमध्ये महापुरामुळे जनजीवन पूर्णत: विस्कळित झाले आहे. शासनातर्फे पूरग्रस्तांना सर्वतोपरी मदत केली जात आहे. सर्वांनी त्यांच्या पाठीशी खंबीरपणे उभे राहून मदत करावी,’’ असे आवाहनही सावे यांनी केले.