जळगाव ः खानदेशातील कापसावर अधिकाधिक प्रक्रिया होऊन त्याला चांगले दर मिळावेत, यासाठी जामनेर (जि. जळगाव) येथे नियोजीत टेक्स्टाईल पार्क रखडले आहे. या पार्कसाठी आवश्‍यक एक हजार एकर जमीन संपादनाची प्रक्रिया पूर्ण झाली. परंतु पुढील कार्यवाही थंड आहे.  मागील भाजप-सेनेच्या सरकारमध्ये टेक्स्टाईल पार्कसंबंधी जलसंपदामंत्री गिरीश महाजन यांनी पुढाकार घेतला. प्रशासनाच्या सहकार्याने यासाठी आवश्‍यक जागा व इतर बाबींबाबत कार्यवाही हाती घेण्यात आली. मागील वर्षी जमीन अधिग्रहण कार्यवाही झाली. शासकीय जागा यासाठी घेण्यात आली आहे. खानदेशात कापूस पीक प्रमुख आहे. त्याची अधिकाधिक खरेदी गुजरातमधील कारखानदार दरवर्षी करतात. तसेच खानदेशलगत पश्‍चिम विदर्भ, मराठवाड्यातील औरंगाबाद, जालना या भागातही कापसाचे जोमदार उत्पादन घेतले जाते. या भागातील कापसावर प्रक्रिया होण्यासाठी टेक्स्टाईल पार्क आवश्‍यक होते. तत्कालीन मुख्यमंत्री पृथ्वीराज चव्हाण यांनीदेखील खानदेशात टेक्स्टाईल पार्कची घोषणा केली होती. परंतु यासंदर्भात पुढे कार्यवाही झाली नाही. आता जामनेरातील टेक्स्टाईल पार्कचा मुद्दाही मागे पडला आहे.  कुठल्याही हालचाली सुरू नाहीत टेक्स्टाईल पार्कसाठी बरड किंवा नापीक जमीन घेतली असून, त्यात कापसापासून रुई, धागा व कापड निर्मिती करण्यासंबंधीचा प्रकल्प उभारण्याचे नियोजन आहे. परंतु प्रत्यक्षात मूलभूत सुविधा, प्रकल्प उभारणी हाती घेतलेली नाही. सुमारे १०० ते १५० कोटी रुपये किमान निधी या कामासंबंधी आवश्‍यक आहे. परंतु मागील पाच ते सहा महिन्यांपासून प्रशासकीय व शासकीय स्तरावरही या प्रकल्पाबाबत कुठल्याही हालचाली सुरू नाहीत.