पुणे : राज्याच्या हवामानात गेल्या दोन-तीन दिवसांत वेगाने बदल झाले आहेत. बुधवारी (ता. ३०) हुडहुडणाऱ्या राज्याच्या किमान तापमान मोठी वाढ झाल्याने शनिवारी (ता.२) थंडी गायब झाली. धुळे येथील कृषी महाविद्यालयात नीचांकी १०.२ अंश सेल्सिअस तापमानाची नोंद झाली. उत्तरेकडील थंड वाऱ्यांना अडथळा निर्माण झाल्याने तापमान वाढले आहे. आज (ता. ३) राज्यात अंशत: ढगाळ हवामानाचा अंदाज वर्तविण्यात आला आहे.    उत्तरेकडील राज्यांमधून येणाऱ्या वाऱ्यांच्या प्रवाहामुळे राज्यात थंडी वाढली होती. बुधवारी (ता. ३०) उत्तर महाराष्ट्र, विदर्भ, मराठवाड्यात अनेक ठिकाणी किमान तापमानात सरासरीच्या तुलनेत तब्बल ६ ते ८ अंशांची घट झाल्याने थंडीची लाट आली, तर कमाल तापमानात घट झाल्याने दिवसही थंड ठरले होते. मंगळवारी (ता. २९) सकाळी धुळे येथील कृषी महाविद्यालयात २.५ अंश सेल्सिअस तापमानाची नोंद झाली. मात्र दोनच दिवसांमध्ये किमान तापमानात मोठी वाढ झाली आहे. धुळे येथे तापमान १०.२ अंशांवर गेले आहे, तर नाशिक वगळता उर्वरीत सर्वच ठिकाणी किमान तापमान १२ अंशांच्या पुढे गेले आहे.  शुक्रवारी (ता. १) पंजाबपासून कर्नाटक किनारपट्टीपर्यंत हवेचा कमी दाबाचा पट्टा सक्रीय होता. त्यामुळे उत्तरेकडील थंड वाऱ्यांना अडथळा निर्माण झाला. बंगालच्या उपसागरावरून राज्याकडे उष्ण वाऱ्यांचे प्रवाह वाढले. परिणामी राज्यातील किमान तापमानात मोठी वाढ झाल्याने थंडी गायब झाली. शनिवारी (ता.२) हा कमी दाबाचा पट्टा मध्य महाराष्ट्र ते मालदीव बेटांपर्यंत सक्रिय होता. त्यामुळे आज (ता. ३) दुपारनंतर राज्यात बहुतांशी ठिकाणी हवामान अंशत: ढगाळ राहण्याचा अंदाज हवामान विभागाने वर्तविला आहे.    शनिवारी (ता.२) सकाळी राज्यातील विविध ठिकाणचे किमान तापमान, कंसात सरासरीच्या तुलनेत तफावत (अंश सेल्सिअसमध्ये) : पुणे १२.७(१), नगर १२.०(०), जळगाव १२.०(०), कोल्हापूर १७.५४(१), महाबळेश्‍वर १३.९(०), मालेगाव १३.४(२), नाशिक ११.३ (०), सांगली १४.१(-१), सातारा १४.७(१), सोलापूर १६.८(०), सांताक्रुझ १६.०(-२), अलिबाग १७.५(०), रत्नागिरी १८.०(-१), डहाणू १७.२(०), आैरंगाबाद १५.०(२), परभणी १५.८ (१), नांदेड १६.० (२), अकोला १५.३(०), अमरावती १५.२(०), बुलडाणा १५.० (-१), चंद्रपूर १४.२(-१), गोंदिया १२.९(-१), नागपूर १२.१(-२), वर्धा १५.२(०), यवतमाळ १२.४(०).