पुणे : मराठा आरक्षण आंदोलन काळात चाकण येथे मोठ्या प्रमाणात बसेची जाळपोळ झाल्याने, शिवाजीनगर येथील एसटी महामंडळातील आगार प्रमुखांनी नगर, औरंगाबाद, नाशिक या ठिकाणी जाणाऱ्या सुमारे 95 बसच्या फेऱ्या बंद केल्या आहेत. त्यामुळे प्रवाशांना तासनतास वाट पाहावी लागत असल्याचे चित्र आहे.  मुंबई, कोकणकडे जाणाऱ्या बस सुरळीत चालू आहे. शिवाजीनगर बस स्थानकातून पुणे जिल्हयातील खेड, जुन्नर, आंबेगाव, शिरूर, दौंड, बारामती, इंदापूर, पुरंदर या तालुक्याच्या ठिकाणी जाणाऱ्या बसच्या फेऱ्याही रद्द केल्या आहेत. परंतु, स्वारगेट येथून भोर, वेल्हा, मावळ, मुळशी या तालुक्याच्या ठिकाणी जाणाऱ्या बसच्या फेऱ्या सुरळीत चालू होत्या. तिकीट बुकीगही बंद असून आज (गुरूवारी) पोलिस विभागाकडून सुचना मिळाल्यानंतर नगर, नाशिक, औरंगाबादकडे जाणाऱ्या बस सोडण्यात येतील अशी माहिती शिवाजीनगर येथील बस स्थानकाच्या आगार प्रमुख एन. पवार यांनी दिली.