जळगाव: खानदेशात अनेक भागात शनिवारी (ता. १६) रात्रीपासून पावसाने हजेरी लावली. रविवारी (ता.१७) दिवसभर व रात्री झालेल्या संततधारेमुळे वाघूर धरण पुन्हा शंभर टक्के भरले. रविवारी (ता.१७) वाघूर धरणाचे आठ दरवाजे उघडण्यात आले. दरम्यान, जळगाव जिल्ह्यात आतापर्यंत ११९ टक्के पाऊस झाला आहे. तर, धुळ्यातही १०५ टक्क्यांवर पाऊस झाला. या ठिकाणी अतिवृष्टीने खरीप हंगाम हातचा गेला आहे. अशा स्थितीत पावसाच्या तडाख्याने कापूस, सोयाबीनच्या पिकांचे नुकसान झाले आहे. 

वाघूर धरण क्षेत्रात शनिवारी रात्रीपासून सुरू असलेल्या संततधारेमुळे पातळीत वाढ होत आहे. सद्यःस्थितीत वाघूर धरणाचे आठ दरवाजे उघडण्यात आले आहेत. मोठ्या प्रमाणात पाण्याचा विसर्ग होत आहे. रविवारी सकाळी धरणाचे चार दरवाजे उघडण्यात आले. धरणातून दोन हजार ७०० क्यूसेक पाण्याचा विसर्ग करण्यात येत होता. यानंतर आणखी चार दरवाजे उघडण्यात आले. एकूण आठ दरवाजे उघडण्यात आले. त्यामुळे धरणातून १३ हजार ३७७ क्यूसेक विसर्ग होत आहे. यामुळे नदीला पूर आला आहे. कोणीही नदीपात्राजवळ जाऊ नये, असे आवाहन पाटबंधारे विभागाने केले. 

जळगाव जिल्ह्यात पावसाची सरासरी ६३२.६ मिलिमीटर आहे. आतापर्यंत ७५३.९ मिलिमीटर अर्थात, ११९.२ टक्के पाऊस झाला.  तर धुळ्यातही सरासरीपेक्षा अधिक म्हणजेच ८०० मिलिमीटरपर्यंत पाऊस झाला आहे. पावसामुळे पिकांची मोठी हानी खानदेशात सुरूच आहे.

शेतीकामे ठप्प आहेत. सोयाबीन पुरता हातचा गेल्यात जमा आहे. कापूसही काळवंडला आहे. जळगाव जिल्ह्यात जळगाव, चोपडा, एरंडोल, धरणगाव, भुसावळ, जामनेर, पाचोरा आदी भागात पावसाने अधिक नुकसान झाले आहे. धुळ्यातही धुळे, साक्री भागात पीकहानी झाली.