सोलापूर : ‘‘माती ही मातीमोल नसून ती जगाला पोसणारी काळी आई आहे. तिचे आरोग्य जपा, तिला समजून घ्या आणि हे करायचे असेल, तर माती परीक्षण ही काळाची गरज आहे. शेतकऱ्यांसाठी जमिनीचे आरोग्य समजून घेणे महत्त्वाचे आहे,’’ असे प्रतिपादन सोलापुरातील विभागीय कृषी संशोधन केंद्राचे सहयोगी संशोधन संचालक डॉ. विजय अमृतसागर यांनी केले.

मोहोळ येथील कृषी विज्ञान केंद्रात जागतिक मृदा दिनानिमित्त आयोजित कार्यक्रमात डॉ. अमृतसागर बोलत होते. कृषी विज्ञान केंद्राचे कार्यक्रम समन्वयक डॉ. दिनेश नांद्रे, कृषी संशोधन केंद्राचे प्रभारी अधिकारी प्रा. डी. डी. कदम, तालुका कृषी अधिकारी बी. डी. सरडे, डॉ. बी. एस. कदम उपस्थित होते.

डॉ. अमृतसागर म्हणाले, ‘‘दिवसेंदिवस जमिनीची सुपीकता आणि आरोग्य बिघडत आहे, त्यातच वाढत चाललेल्या रासायनिक खतांचा बेसुमार वापर यामुळे जमिनीचे आरोग्य धोक्‍यात आहे. त्यामुळेच यापुढील काळात सेंद्रिय खताचा वापर मोठ्या प्रमाणात करण्याची गरज आहे. एकदमच सेंद्रियवर जाण्याऐवजी रासायनिक आणि सेंद्रिय असा मध्य साधावा.’’

प्रारंभी उपस्थित शेतकऱ्यांना माती नमुना कसा घ्यावा, याबद्दलचे प्रात्यक्षिक काजल जाधव यांनी दाखविले. कृषी विज्ञान केंद्र परिसरामध्ये गहू, ज्वारी, मका, हरभरा, बाजरी करडई, लसून घास, बरसीम घास, ओट घास अशा प्रकारच्या विविध पिकांचे पीक संग्रहालय व विविध वाण याबद्दलची माहिती डॉ. तानाजी वळकुंडे यांनी शेतकऱ्यांना दिली. तालुका कृषी अधिकारी सरडे यांनी कृषी विभागातील विविध योजनांबद्दलची माहिती व त्यातील शंकेचे निरसन केले.