नाशिक : जिल्ह्यात जूनच्या सुरुवातीला पावसाचे आगमन झाल्यानंतर पिकेही अंकुरली होती. मात्र, महिन्याच्या मध्यंतरीपासून पावसाने खंड दिला. त्यामुळे काही ठिकाणी पिके कोमेजून गेली. तर काही शेतकऱ्यांवर दुबार पेरण्यांची वेळ आली. अशातच पावसाची प्रतीक्षा लागून असताना सोमवारी (ता. २९) निफाड, मालेगाव, सटाणा पावसाने दमदार हजेरी लावल्याने शेतकऱ्यांची चांगल्या पावसाची प्रतीक्षा संपली.

त्यामुळे पिकांना जीवदान मिळाले असून खरिपात मोठा आधार झाला आहे. प्रामुख्याने येवला, नांदगाव, चांदवड, निफाड, देवळा, सटाणा, कळवण व सिन्नर तालुक्यात मका, सोयाबीन व कापूस पिकासाठी पावसाची प्रतीक्षा कायम होती. तर पेठ, इगतपुरी, सुरगाणा व त्र्यंबकेश्वर तालुक्यातील भाताची रोपे पावसाविना पिवळी पडू लागली होती. मात्र, झालेल्या पावसाने शेतकऱ्यांना दिलासा दिला. जिल्ह्यात दुपारनंतर पावसाने हजेरी लावल्यानंतर अनेक भागात शेतामध्ये पाणी साचल्याचे पाहायला मिळाले.

जिल्ह्यात सर्वाधिक पाऊस निफाड, मालेगाव, सटाणा तालुक्यात झाला. निफाड तालुक्यात काही ठिकाणी पेरण्या पूर्ण झाल्या. पेरणीची कामे मका सोयाबीनसह पूर्ण झाले तर काही ठिकाणी पेरण्या खोळंबल्या होत्या. पावसाच्या प्रतीक्षेत असलेला शेतकरी पावसाने हजेरी लावल्यामुळे समाधानी आहे. या पावसाने पिकांना जीवदान मिळेल, अशी शेतकऱ्यांना अपेक्षा आहे. कोकणगाव परिसरात झालेल्या जोरदार पावसामुळे सर्वत्र पाणीच पाणी झाल्याचे पाहायला मिळाले.

देवळा व नांदगाव तालुक्यातील अनेक भागात दुपारनंतर जोरदार सरी झाल्या. पेठ, त्र्यंबकेश्वर, सुरगाणा तालुक्यातील आदिवासी भागात भात, नागली पिकासाठी पावसाची प्रतीक्षा होती. मात्र, या पावसाने त्यांची अडचण सोडवली आहे.

जिल्ह्यात विविध ठिकाणचा जोरदार पाऊस (मिमी) : निफाड तालुका : सायखेडा ५४, लासलगाव ९२, पिंपळगाव बसवंत ८८, चांदोरी ५२. सटाणा तालुका : सटाणा ६६, ब्राह्मणगाव ४८, ताहाराबाद ४१, जायखेडा ६२, नामपूर ७५, नामपूर ७५, डांगसौदाणे ५२. देवळा तालुका : लोहोणेर ६०. मालेगांव तालुका ः मालेगांव ६६, दाभाडी ६१, वडनेर ७२, करजगव्हण ८२, निमगाव ५२. येवला तालुका : जळगाव नेउर ५६. कळवण तालुका : कळवण ४०. नाशिक तालुका : नाशिक ४०, माडसागंवी ८३.