सांगली  ः जिल्ह्यातील ६८ हजार ०१८ शेतकऱ्यांनी पीक विमा योजनेत सहभाग घेतला आहे. जिल्हा बॅंकेच्या मुख्य कार्यालयात कोरोनाचे रुग्ण सापडले. त्यामुळे जिल्हा बॅंकेतर्फे घेण्यात आलेल्या विम्याची माहिती अद्यापही अपलोड केली नाही. गतवर्षी १ लाख ३० हजार शेतकऱ्यांनी पीक विमा घेतला होता. यंदा कोरोनामुळे करण्यात आलेला लॉकडाउन त्यातच कागदपत्रांची पुर्तता करण्यासाठी अडचणी निर्माण झाल्या. त्यामुळे गतवर्षीपेक्षा चालुवर्षी शेतकरी संख्या घटण्याची शक्यता आहे.

पिकांचे दुष्काळ, अवेळी पाऊस, अतिपाऊस, यासह नैसर्गिक बाबींमुळे पिकांचे नुकसान झाले. त्यांना पीक विमा देऊन त्याचे संरक्षण करण्यासाठी पीक विमा योजना राबवली जाते. जत तालुक्यात पीक विमा भरण्यासाठी शेतकऱ्यांची संख्या अधिक असल्याचे चित्र आहे. यंदा पीक विमा भरण्यासाठी शासनाने शेतकऱ्यांना प्रोत्साहन केले. परंतू सातत्याने तांत्रिक अडचणींमुळे विमा भरण्यास अडथळे निर्माण झाले. त्याच कोरोना विषाणूचा प्रादुर्भाव वाढला होता. त्यामुळे अनेक ठिकाणी यंत्रणा बंद होती. त्यातच जिल्हा प्रशासनाने २३ जुलै ते ३० जुलै आठ दिवस लॉकडाउन जाहीर केला होता. त्यामुळे शेतकऱ्यांना कागदपत्रांची पुर्तता करणे कठीण झाले. 

शेतकऱ्यांनी कागदपत्रांची पुर्तता करुन पिकांना विम्याचे संरक्षण दिले. जिल्ह्यातील ६८ हजार ०१८ शेतकऱ्यांनी पीक विम्यात सहभाग घेतला असला, तरी जिल्हा बॅंकेतील शेतकऱ्यांची संख्या यामध्ये अजून समाविष्ट केलेली नाही.  गतवर्षी अंदाजे १ लाख ३० हजार शेतकऱ्यांनी पिकांना विम्याचे संरक्षण दिले होते. यंदा शेतकऱ्यांची संख्या कमी होण्याची शक्यता आहे.