अकोला : जिल्ह्यात तेल्हारा, अकोट तालुक्यांत बुधवारी (ता. २०) रात्री, गुरुवारी (ता. २१) पहाटे काही भागांत पावसाच्या मध्यम स्वरूपात सरी कोसळल्या. देवरी फाटा परिसरात रात्री हरभऱ्याच्या आकाराएवढ्या गाराही पडल्याने काही वेळ नागरिकांची तारांबळ उडाली. 

विजांचा कडकडाट तसेच वादळासह अवकाळी पाऊस झाला. प्रामुख्याने रात्री आठच्या सुमारास तेल्हारा येथे पाऊस झाला. याच दरम्यान देवरी फाटा परिसरात पावसासह गारपीटसुद्धा झाली. तेल्हारा तालुक्यात बहुतांश भागात बुधवारी रात्री वादळी वाऱ्यासह अवकाळी पाऊस पडला. या तालुक्यातील बेलखेड, राणेगाव, पाथर्डी, घोडेगाव अादी ठिकाणी रात्री वादळी पाऊस झाला. विजेच्या कडकडासह पावसाच्या सरी झाल्या. 

अकोट तालुक्यात मुंडगाव, देवरी या गावात पाऊस झाला. यामुळे शेतकरी चिंतातूर झाला होता. या भागात रब्बीत हरभऱ्याची लागवड केलेली अाहे. काही शेतांमध्ये हरभरा सोंगून ठेवलेला असून, तो ओला झाला. परिणामी या हरभऱ्याचे घाटे गळून पडण्याची भीती व्यक्त होत अाहे. काही ठिकाणी वादळामुळे शेतात उभे असलेले गव्हाचे पीक लोळले अाहे. २० ते २५ मिनिटे झालेल्या या पावसामुळे रात्रीच्या वेळी नागरिकांची मोठी तारांबळ उडाली. अंधारामुळे सोंगून ठेवलेला हरभरा झाकणेसुद्धा शेतकऱ्यांना शक्य  झाले नाही. गुरुवारी दिवसभर वातावरण स्वच्छ होते. काहिसा दमटपणा मात्र जाणवत होता.