नगर ः राज्याच्या राजकारणात सातत्याने चर्चेत असलेले गृहनिर्माण मंत्री आणि ज्येष्ठ नेते राधाकृष्ण विखे पाटील यांच्या शिर्डी विधानसभा मतदारसंघातील लढतीकडे राज्याचे लक्ष लागले आहे. विखे पाटील यांच्याविरोधात तगडा उमेदवार दिला जाणार असल्याची चर्चा होती. मात्र येथून कॉंग्रेसचे प्रदेशाध्यक्ष बाळासाहेब थोरात यांचे चुलतबंधू सुरेश थोरात निवडणूक रिंगणात आहेत. आता थोरात हे विखे-पाटील यांना किती ताकदीने लढत देतात याची उत्सुकता आहे.  

राज्याच्या राजकारणात नगर जिल्ह्याचे स्थान महत्त्वाचे राहिले आहे. कॉंग्रेसचे प्रदेशाध्यक्ष बाळासाहेब थोरात, युवक कॉंग्रेसचे अध्यक्ष सत्यजित तांबे हे संगमनेरचे. नगरच्या राजकारणातील विखे पाटील परिवारही कायम चर्चेत राहिला आहे. लोकनेते बाळासाहेब विखे-पाटील यांनी लोकसभेत कॉंग्रेसकडून अनेक वर्षे प्रतिनिधित्व केले. आता त्यांचे नातू खासदार डॉ. सुजय विखे भाजपकडून निवडून आले आहेत.

यंदाच्या लोकसभा निवडणुकीत कॉंग्रेसकडून सुजय विखे यांना उमेदवारी मिळाली नसल्याने त्यांनी भाजपमध्ये प्रवेश केला. राधाकृष्ण विखे सध्या गृहनिर्माण मंत्री आहेत. विखे पाटील भाजपमध्ये गेल्यानंतर बाळासाहेब थोरात यांच्याकडे कॉँग्रेसचे प्रदेशाध्यपद आले. विखे-थोरात यांचा राजकारणातील संघर्ष नगर जिल्ह्याने कायमच अनुभवला आहे. विखे यांनी कॉंग्रेस सोडल्यानंतर थोरात- विखे यांचा राजकीय संघर्ष अधिकच तीव्र झाला आहे. 

जिल्ह्यात भाजप-सेना युतीचे बाराही आमदार निवडून आणणार असे विखे पाटील यांनी अनेकदा सांगितले. त्यांच्या प्रयत्नातून अनेकांनी कॉंग्रेस पक्षही सोडला. थोरात यांनी मात्र विखे यांना शिर्डीतून तगडे आव्हान देण्याचा प्रयत्न केला. त्यानुसार आमदार सुधीर तांबे किंवा युवक कॉंग्रेसचे अध्यक्ष सत्यजित तांबे निवडणूक रिंगणात असतील असा अंदाज बांधला जात असताना शिर्डीतून कॉंग्रेसने सुरेश थोरात यांना रिंगणात उतरवले आहे. मुळात या मतदार संघावर विखे पाटील यांची कायम पकड आहे. 

संगमनेर तालुक्यातील आश्वी पट्टयातील २८ गावे शिर्डी मतदार संघात आहेत. त्याचा थोरात यांना फायदा होईल, असे वाटत असले तरी विखे पाटील यांना पराभूत करणे एवढे सोपे नाही असे दिसत आहे.