नाशिक : चिकन खाल्ल्याने कोरोना होत असल्याच्या सोशल मीडियावरच्या अफवेमुळे कुक्कुटपालक शेतकरी मोठ्या अडचणीत सापडला आहे. या परिस्थितीच्या पार्श्वभूमीवर नाशिक जिल्हा काँग्रेस कमिटीच्या वतीने सचिव सचिन होळकर यांच्या उपस्थितीत शिष्टमंडळाने कुक्कुटपालन करणाऱ्या शेतकऱ्यांना नुकसानभरपाई मिळण्याबाबत महसूलमंत्री बाळासाहेब थोरात यांना नुकतेच निवेदन देण्यात आले. 

सध्या परिस्थितीमध्ये प्रतिकिलो साठी ७५ ते ८० रुपये उत्पादनखर्च येत आहे. मात्र दहा रुपये किलोने विक्री करणेदेखील कठीण झाले आहे. अनेकांना ग्राहक न मिळाल्याने जिवंत कोंबड्या पुरून अथवा मारून टाकाव्या लागत आहे. अशी भयानक अवस्था निर्माण झाल्याने शेतकरी हवालदिल झाला आहे. अशा परिस्थितीमध्ये शेतकऱ्यांना मोठ्या आधाराची गरज आहे. अन्यथा कुक्कुटपालन व्यवसाय कायमचा अडचणीत सापडण्याची शक्यता आहे. याविषयी महसूलमंत्री बाळासाहेब थोरात यांच्याशी सचिन होळकर यांच्यासह इतर पोल्ट्रीधारक शेतकऱ्यांनी सविस्तर चर्चा केली. अगोदर प्रत्येक जिल्ह्यामध्ये नुकसानीचे पंचनामे करून घेणे अत्यंत गरजेचे आहे या संदर्भात सूचना त्यांनी दिल्या.

सरकारकडून जर कुक्कुटपालन करणाऱ्या शेतकऱ्यांना भरपाई मिळाली नाही, तर मोठ्या प्रमाणात आंदोलन करण्यात येईल. निवेदन देताना जितेश साबळे, विष्णू पंडित, जितेंद्र ताजणे, सोमनाथ सातपुते, राजू भोर, सुनील कोटकर, किशोर शिरसाठ, राजेंद्र घुगे, भाऊसाहेब साबळे आदी कुक्कुटपालक शेतकरी उपस्थित होते.

प्रमुख मागण्या