रेणापूर, जि. लातूर : भंडारवाडी (ता. रेणापूर) येथील रेणा मध्यम प्रकल्पातून नदीपात्रात पाणी सोडण्यास जिल्हाधिकारी जी. श्रीकांत यांनी स्थगिती दिली.

नगरपंचायतीचे पदाधिकारी आणि शेतकऱ्यांच्या संयुक्त बैठकीत ऑक्‍टोबर महिन्यापर्यंत पाणी पिण्यासाठी पुरेल असे नियोजन करण्याचे आदेश त्यांनी दिले. संबंधित यंत्रणेने प्रकल्पातून होणारी पाणीचोरी रोखण्यासाठी कठोर उपाययोजना कराव्यात, असे आदेशही श्रीकांत यांनी दिले.   घनसरगाव येथील शेतकऱ्यांनी पाणी नदीपात्रात सोडण्याची मागणी करून आत्मदहनाचा इशारा दिला. त्यावरून पाटबंधारे विभागाने पाणी सोडण्याची तयारी चालवली होती. हे लक्षात येताच रेणापूर नगरपंचायतीचे उपनगराध्यक्ष अभिषेक आकनगिरे यांच्या नेतृत्वात नागरिकांनी मागच्या तीन दिवसांपासून प्रकल्पाच्या दरवाजासमोर ठिय्या आंदोलन सुरू केले होते. गुरुवारी तहसीलदारांसह पाटबंधारे विभागाच्या अधिकाऱ्यांनी आंदोलनकर्त्यांची भेट घेत माघार घेण्याची विनंती केली. ग्रामस्थांनी ती फेटाळत आंदोलन सुरूच ठेवले. 

शुक्रवारी श्रीकांत यांनी आंदोलनकर्ते आणि पाणी सोडण्याची मागणी करणाऱ्या शेतकऱ्यांची बैठक घेतली. ऑक्‍टोबर अखेरपर्यंत पाणीपुरवठ्याचे नियोजन करावे. पिण्याच्या पाण्याला प्राधान्य द्यावे, अशा सूचना केंद्रेकर यांनी जिल्हाधिकाऱ्यांना केल्या. पर्यावरणातील बदलानुसार जुलैपर्यंत पाऊस पडत नाही. त्यामुळे ऑक्‍टोबरपर्यंत पाणी पुरेल याची काळजी घ्या, असे ते म्हणाले. रेणापूर नगरपंचायतीकडे थकबाकी नसल्याचे स्पष्ट झाले.