धुळे : यंदा पपईचे पीक कमी पाऊस असतानाही सातपुडा पर्वतालगत आणि तापी काठावरील गावांमध्ये जोमात आहे. आवक सुरू झाली आहे. परंतु, अडखळतच आवक असून, दर टिकून आहेत.

जळगाव जिल्ह्यातील रावेर, चोपडा; धुळे जिल्ह्यातील शिरपूर, धुळे; नंदुरबार जिल्ह्यात शहादा, नंदुरबार व नवापुरात पपईची लागवड झाली आहे. मार्चमध्ये यंदा फारशी लागवड नव्हती. अधिकची लागवड एप्रिल व मे अखेरीस झाली. यामुळे यंदा आवक काहीशी लांबली आहे. बाजार समित्यांमध्ये कमी दर्जाची लहान आकाराची पपईची फळे येत आहेत. त्यांना प्रतिक्विंटल १००० ते १५०० रुपये दर आहेत. किरकोळ बाजारात २० रुपये प्रतिकिलोपासून दर आहेत.

शहादा व शिरपुरातील काही गावांमध्ये पहिली काढणी झाली आहे. पपईला सुरवातीला १५ रुपये प्रतिकिलोचा दर मागील आठवड्यात मिळाला. अजूनही दर टिकून आहेत. पपईची पाठवणूक मध्य प्रदेश, राजस्थान व दिल्ली येथे झाली.

शहादा येथे दिल्ली येथील व्यापाऱ्यांनी भेट देऊन शेतकरी, पपईचे खरेदीदार यांच्याशी चर्चा केली. तसेच, आगाऊ नोंदणीही केली. अर्थातच पुढेही दर टिकून राहतील, असे संकेत मिळत आहेत. मागील वर्षी पपईची काढणी ऑक्‍टोबरच्या मध्यात जोमात सुरू झाली होती. चोपडा येथून चांगली आवक होती. पाऊस कमी असला, तरी पपईच्या बागा जोमात आहेत. फळे लगडली आहेत. यंदा दर टिकून राहतील, अशी अपेक्षा वडछील (ता. शहादा, जि. नंदुरबार) येथील शेतकरी रोहित पटेल यांनी व्यक्त केली.