अमरावती : अंजनगावसुर्जी तालुक्यात गेल्या वर्षी मे महिन्यात चक्रीवादळामुळे घरांसह संत्रा पिकाचे मोठे नुकसान झाले होते. प्रशासनाकडून सर्वेक्षण आणि पंचनामे करण्यात आले. मात्र वर्षभराचा कालावधी उलटूनही अद्याप शेतकऱ्यांना मदत मिळाली नाही. ती त्वरित मिळावी, अशी मागणी धाणेगाव येथील संत्रा उत्पादक शेतकऱ्‍यांनी आमदार बळवंत वानखडे यांच्याकडे केली आहे.

अंजनगावसुर्जी तालुक्यातील बहुतांश गावांमध्ये चक्रीवादळाने मोठे नुकसान झाले होते. अनेकांच्या घरावरील टीनपत्रे उडून गेले. संत्रा बागांमधील फळांची गळ झाली. त्यासोबतच इतर पिकांचे देखील नुकसान झाले. या नुकसानीचे सर्वेक्षण आणि पंचनामे व्हावे, अशी मागणी त्या वेळी शेतकऱ्‍यांनी रेटली होती. सर्वेक्षणासाठी विविध पातळ्यांवर निवेदने देण्यात आली. त्याच्या परिणामी प्रशासनाकडून नुकसानग्रस्त भागात सर्वेक्षण आणि पंचनाम्याचे सोपस्कार पूर्ण करण्यात आले.

दरम्यान, राज्य सरकारने नुकसानग्रस्त भागासाठी भरपाई जाहीर केली. त्याचे वाटपदेखील राज्यातील बहुतांश गावांमध्ये झाले. धनेगाव येथील संत्रा उत्पादक शेतकऱ्यांना देखील मदत जाहीर झाली. गावातील काही शेतकऱ्यांना मदत मिळालीदेखील; परंतु ७५ टक्के शेतकरी निधीच्या कमतरतेमुळे अद्यापही भरपाईपासून वंचित आहेत. त्यांच्याकडेच आणि तिची उपलब्धता व्हावी यासाठी तहसीलदार स्तरावरून जिल्हाधिकाऱ्यांकडे पाठपुरावा करण्यात आला. मात्र निधीची उपलब्धता न झाल्याने गेल्या वर्षभरापासून धनेगाव येथील बहुतांश शेतकरी भरपाईच्या प्रतीक्षेत आहेत.

दरम्यान, अन्यायग्रस्त आणि भरपाईपासून वंचित शेतकऱ्यांनी आमदार बळवंत वानखडे यांची भेट घेतली. वंचित शेतकऱ्यांना भरपाई मिळावी याकरिता आमदारांनी पाठपुरावा करावा, अशी मागणी करण्यात आली. प्रदीप येवले, सुनील येवले, गोपाल भुयार, विनोद सरदार, अंकुश पांडे, गजानन येवले, रोशन पोहनकर, प्रशांत पोहनकर, प्रमोद येवले, शुभम येवले, एकनाथ येवले यांच्यासह शेतकरी उपस्थित होते.