वडाळा, जि. सोलापूर : उत्तर सोलापूर तालुक्‍यातील वडाळा, रानमसले, वांगी आदी परिसरातील सुमारे १७५ शेतकऱ्यांनी एका खासगी कंपनीच्या कांदा बियाणांची लागवड केली. पण त्याची उगवणच न झाल्याने लाखो रुपयांचे नुकसान सोसण्याची वेळ आली आहे. विशेष म्हणजे कांद्याचा  बाजारभाव तेजीत असताना, असा दुर्दैवी प्रसंग शेतकऱ्यांवर ओढावल्याने संबंधित कंपनीविरुद्ध ठोस कारवाईची मागणी होत आहे.

वडाळा येथील एका केंद्रातून वडाळा, पडसाळी, वांगी, केमवाडी, रानमसले आदी परिसरातील शेतकऱ्यांनी बंगळूर स्थित एका हायब्रीड कंपनीचे कांदा बियाणे खरेदी केले होते. शेतकऱ्यांनी कांदा लागवड करून अडीच ते तीन महिने उलटले, तरी कांद्याची वाढ होत नसल्याचे शेतकऱ्यांच्या निदर्शनास आले. त्यानंतर त्यांनी दुकानदार आणि संबंधित कंपनीकडे धाव घेतली. पण, अद्याप तरी त्यावर काहीच कारवाई झाली नाही. त्यामुळे शेतकऱ्यांनी थेट कृषी विभागाच्या तक्रार निवारण समितीकडे धाव  घेतली. 

दोन दिवसांपूर्वी कृषी विद्यापीठाच्या संशोधन केंद्राचे शास्त्रज्ञ टी. एस. भोंडवे, ‘‘महाबीज’चे प्रतिनिधी अतुल गेडाम, तालुकास्तरीय तक्रार निवारण समितीचे सदस्य, तसेच समितीचे अध्यक्ष, उपविभागीय कृषी अधिकारी यांचे प्रतिनिधी एस. के. होनमाने, के. एन. श्रावस्ती, तालुका कृषी अधिकारी नंदकुमार पाचकुडवे आदींनी संबंधित शेतकऱ्यांच्या शेतीची पाहणी केली. त्या वेळी त्यांच्याही निदर्शनास बियाणातील दोष आले. पण नेमके हे कशामुळे झाले, याचा अभ्यास करून वरिष्ठांना अहवाल पाठवण्यात येईल, असे सांगण्यात आले. 

दरम्यान, संबंधित कृषी केंद्रचालक, बियाणे कंपनी व प्रतिनिधी विरोधात कठोर कारवाई करून शेतकऱ्यांना नुकसानभरपाई द्यावी, अशी मागणी पीडित शेतकऱ्यांनी उत्तर सोलापूर तालुका कृषी विभागाकडे केली आहे. सध्या कांद्याचे भाव गगनाला भिडले आहेत.

सोलापूर बाजार समितीत कांद्याला नऊ हजार रुपये प्रति क्विंटल इतका भाव मिळत आहे. तर दुसरीकडे कांदा उत्पादक शेतकऱ्यांची फसवणूक झाल्याने कांदा उत्पादक शेतकरी संतप्त झाले आहेत. यामुळे चालू बाजारभावाप्रमाणे एकरी किमान सात लाख रुपयेप्रमाणे नुकसानभरपाई मिळावी, अशी मागणी शेतकऱ्यांची आहे.