सोलापूर  : सोलापूर जिल्हा बॅंकेच्या सव्वा लाख कर्जदारांपैकी अद्यापही ४० हजार कर्जदारांची यादीच बॅंकेला प्राप्त न झाल्याने तब्बल २५३ कोटी रुपये शासनाकडे अडकले अाहेत. मार्च २०१७ मध्ये कर्ज घेऊनही जून २०१८ मध्ये कर्जदारांनी कर्जाची परतफेड न केल्याने बॅंकेने तब्बल ७० हजार कर्जदारांना वसुलीची नोटीस दिल्याचे बॅंकेचे सरव्यवस्थापक किसन मोटे यांनी सांगितले.

नियमित कर्ज परतफेड करणाऱ्यांना २५ हजार रुपयांचे प्रोत्साहन अनुदान आणि दुसरीकडे कर्ज थकवून बॅंकेला अडचणीत आणलेल्यांना दीड लाखाची माफी, असा दुजाभाव केल्याने मागच्या वर्षी बॅंकेच्या ७० हजार शेतकरी कर्जदारांनी बॅंकेचे कर्जच फेडले नाही.

कर्जमाफीची प्रक्रिया गेल्या काही महिन्यांपासून ठप्पच आहे. त्यामुळे सद्यःस्थितीत बॅंकेची नव्याने ८३२ कोटी रुपयांची थकबाकी वाढली आहे. त्यातच वारंवारच्या दुष्काळी परिस्थितीमुळेही कर्जवसुली स्थगित केल्याने थकबाकीत वाढ होत आहे. त्याचा परिणाम मात्र आता रब्बी हंगामात होणार आहे. पाण्याअभावी पिके संकटात आली आहेत. परिणामी, रब्बीच्या कर्जवाटपातही घट होणार आहे. या सगळ्या परिस्थितीमुळे आता पुन्हा वसुलीसाठी बॅंकेला प्रयत्न करावे लागणार आहेत, असे सांगण्यात आले. त्यानुसारच या नोटिसा देण्यात येत आहेत.