अकोलाः निंभोरा गावाजवळ साकारत असलेल्या कोल्हापुरी बंधाऱ्याचे काम तातडीने पूर्ण करा, तसेच शेतीच्या माहितीसाठी ग्रामस्थांना रस्त्याचे बांधकाम करून द्यावे अशा सूचना आमदार रणधीर सावरकर यांनी केली. अधिकाऱ्यांसह त्यांनी बंधारा बांधकामस्थळी भेट देऊन आढावा घेतला.  मौजे निंभोरा गावाजवळ तत्कालीन शासनाकडे विशेष मागणी करून सुमारे २.६३ कोटी रुपयांचा कोल्हापुरी बंधारा आमदार सावरकर यांनी मंजूर करून घेतला. खारपान पट्ट्यातील शेतकऱ्यांना संरक्षित सिंचनाची सुविधा निर्माण व्हावी यासाठी तत्कालीन जलसंधारण मंत्री राम शिंदे यांच्या दौऱ्याची आखणी केली होती. या दौऱ्यामध्ये ८ नोव्हेंबर २०१७ रोजी आमदार सावरकर यांनी सदर बंधारा मंजूर करण्याची मागणी केली.  त्यानंतर सुरू झालेल्या बंधाऱ्याच्या कामाचा आढावा घेण्यासाठी जिल्‍हा जलसंधारण अधिकारी श्री. गीते, उपविभागीय जलसंधारण अधिकारी श्री. वानरे, शासकीय कंत्राटदार तसेच स्‍थानिक ग्रामस्‍थांसह त्यांनी कामाच्‍या प्रगतीची पाहणी केली. बंधारा खारपाण पट्टयात येत असल्‍याने बंधारा पावसाळ्यातील पुराच्या पाण्‍यात स्थिर राहावा याकरिता बंधाऱ्याच्‍या की वॉल व विंग वॉल आवश्‍यकतेप्रमाणे वाढविण्‍यात याव्‍यात. बंधाऱ्यापासून गावाकडे असणारा तसेच पैल तिराकडे जाणारा रस्‍ता अशा आवश्‍यक असलेल्‍या किमान ५०० मीटर लांबीमध्‍ये रस्‍त्‍याचे बांधकाम करण्‍यात यावे. उपरोक्त कामांच्या प्रस्तावाला शासन स्तरावरून तातडीने मान्यता घेऊन कामे पूर्ण करण्यात यावीत, असेही त्यांनी सुचवले. या वेळी ज्येष्ठ सामाजिक कार्यकर्ते महादेवराव भुईभार, जिल्हा परिषद सदस्य तुकाराम दाबेराव, उपसरपंच अतुल आवारे, ताथोड गुरुजी, राजेश दिगंबर भुईभार, भरत काळमेघ, विनय भटकर, गणेश काळमेघ, राजेश पंजाबराव भुईभार, केशव ताठे, गजानन राजभाट, रमेश ताठे, मनोज गावंडे, प्रमोद भुईभार, शरद ताथोड, लव भटकर आदी उपस्थित होते.