नांदेड ः नांदेड, परभणी, हिंगोली या जिल्ह्यांमध्ये किमान आधारभूत किंमत योजनेअंतर्गंत हमीभावाने (प्रतिक्विंटल ५८०० रुपये) तूर विक्रीसाठी राज्य सहकारी पणन महासंघ आणि विदर्भ सहकारी पणन महासंघअंतर्गत २३ खरेदी केंद्रांवर शनिवार (ता. २९) पर्यंत ३९ हजार ९२९ शेतकऱ्यांनी ऑनलाइन नोंदणी केली आहे. या तीन जिल्ह्यांतील २ हजार १२३ शेतकऱ्यांची १७ हजार १.९४ क्विंटल तूर खरेदी करण्यात आली आहे. 

हमीभावाने तूर खरेदी करण्यासाठी यावर्षी (२०१९-२०) नाफेड तर्फे राज्य सहकारी पणन महासंघ, विदर्भ सहकारी पणन महासंघ, महाएफपीसी यांच्यामार्फत शेतकऱ्यांची नोंदणी केली जात आहे. नांदेड जिल्ह्यात जिल्हा पणन अधिकारी कार्यालयाअंतर्गत नांदेड, हदगाव, किनवट, मुखेड केंद्रांवर शनिवार (ता. २९) पर्यंत ८ हजार ८ शेतकऱ्यांनी तर विदर्भ सहकारी महासंघाच्या भोकर, धर्माबाद, नायगाव येथील केंद्रावर २ हजार ८९० शेतकऱ्यांनी ऑनलाइन नोंदणी केली. जिल्हा पणन अधिकारी कार्यालयाअंतर्गंत २५१ शेतकऱ्यांची ९९१.८५ क्विंटल आणि विदर्भ सहकारी पणन महासंघातर्फे १९३ शेतकऱ्यांची ९९३.५० क्विंटल तूर खरेदी करण्यात आली.

राज्य सहकारी पणन महासंघअंतर्गत जिल्हा पणन अधिकारी कार्यालयातर्फे परभणी जिल्ह्यातील परभणी, जिंतूर, सेलू, पाथरी, सोनपेठ, पालम, पूर्णा या सात केंद्रांवर मिळून एकूण १४ हजार १ शेतकऱ्यांनी आणि हिंगोली जिल्ह्यातील हिंगोली, कन्हेरगाव, कळमनुरी, वसमत, जवळाबाजार, सेनगाव, साखरा येथील केंद्रांवर मिळून एकूण ११ हजार ७४९ शेतकऱ्यांनी ऑनलाइन नोंदणी केली आहे.

विदर्भ सहकारी महासंघातर्फे परभणी जिल्ह्यातील मानवत आणि गंगाखेड येथील केंद्रांवर ३ हजार २८१ शेतकऱ्यांची ऑनलाईइन नोंदणी केली आहे. पणन महासंघातर्फे परभणी जिल्ह्यात ४३७ शेतकऱ्यांची ४ हजार २४५.१९ क्विंटल आणि विदर्भ सहकारी महसंघातर्फे ४९९ शेतकऱ्यांची ४ हजार २७६.५ क्विंटल तूर खरेदी करण्यात आली. हिंगोली जिल्ह्यात पणन महासंघातर्फे ७४५ शेतकऱ्यांची ६ हजार ४९४.९० क्विंटल तूर खरेदी करण्यात आली. नोंदणीच्या तुलनेत खरेदीचा वेग कमी आहे.