नांदेड : यंदा उन्हाळी हंगामात जिल्ह्यात गुरुवार (ता. २०) पर्यंत ४ हजार ६०३ हेक्टरवर भुईमुगाची पेरणी झाली आहे. जिल्ह्यात एकूण ५ हजार ४६९ हेक्टरवर (८७.६४ टक्के) उन्हाळी पिकांची पेरणी झाली आहे, अशी माहिती कृषी विभागाच्या सूत्रांनी दिली.

जिल्ह्यातील उन्हाळी पिकांचे सर्वसाधारण क्षेत्र ६ हजार २४० हेक्टर आहे. या हंगामात भुईमूग, ज्वारी, मका, तांदूळ, तीळ आदी पिके घेतली जातात. सिंचन स्रोतांना मुबलक प्रमाणात पाणी आहे. त्यामुळे गतवर्षीच्या तुलनेत यंदा उन्हाळी हंगामातील क्षेत्रात वाढ अपेक्षित आहे.

गुरुवार (ता. २०) पर्यंत पेरणी झालेल्या क्षेत्रात सर्वाधिक म्हणजे ४ हजार ६०३ हेक्टरवर भुईमूग, ५९६ हेक्टरवर ज्वारी, २७० हेक्टरवर मका या पिकांची पेरणी झाली आहे.

उन्हाळ्यातील नगदी पीक म्हणून भुईमुगाला शेतकऱ्यांनी अधिक प्राधान्य दिले आहे. ज्वारी, मका या अन्नधान्य, चारा पिकांची पेरणी झाली आहे. कंधार तालुक्यात उन्हाळी पिकांचे पेरणी क्षेत्र सर्वाधिक आहे. मुदखेड तालुक्यात उन्हाळी पिकांच्या पेरणी क्षेत्राची अद्याप नोंद झाली नाही.