पुणे : पश्चिम राजस्थानात २५ जूनच्या दरम्यान दाखल झालेल्या मॉन्सूनने परतीचा प्रवास सुरू केला आहे. सोमवारी (ता.२८) पश्चिम राजस्थान आणि पंजाब या भागातून माघारी फिरला असल्याची माहिती हवामान विभागाच्या सूत्रांनी दिली.

परतीच्या प्रवासासाठी पोषक असलेली स्थिती देशाच्या वायव्य भागातील बाहेरच्या बाजूकडील भागात तयार झाली आहे. तसेच राजस्थानच्या दक्षिण भागातही चक्राकार वाऱ्याची स्थिती आहे. त्यामुळे पंजाबच्या अमृतसर, भटिंडा, राजस्थानमधील हनुमानगड, बिकानेर, जैसलमेर या भागापर्यंत मॉन्सूनने माघार घेतली आहे. या भागात मॉन्सूनच्या परतीच्या प्रवासासाठी आवश्यक असलेली पोषक स्थिती कायम आहे. येत्या दोन ते तीन दिवसात हरियाना, चंडीगड आणि दिल्ली, उत्तर प्रदेश व मध्य प्रदेश या भागातून मॉन्सूनचे वारे परतण्याची शक्यता आहे.