पुणे : नैर्ऋत्य मोसमी वारे (मॉन्सून) सोमवारी (ता.१) देवभुमी केरळमध्ये दाखल झाले आहे. मंगळवारी (ता.२) मॉन्सूनने प्रगती केली नाही. मात्र पुढील वाटचालीस पोषक हवामान असल्याने आज (ता.३) कर्नाटक, मध्य अरबी समुद्रासह, बंगालच्या उपसागराच्या आणखी भागात मॉन्सून दाखल होण्याची शक्यता हवामान विभागाने वर्तविली आहे. 

अरबी समुद्रात असलेल्या निसर्ग चक्रीवादळामुळे वाऱ्यांना खेचून आणल्याने मॉन्सून नियमित वेळवर १ जून रोजी केरळमध्ये दाखल झाला आहे. मॉन्सूनने सोमवारी केरळच्या कन्नूर, तामिळनाडूच्या कोईंबतूर, कन्याकुमारीपर्यंतचा भाग व्यापला. चक्रीवादळ उत्तरेकडे सरकत जाताना किनारपट्टीलगत मॉन्सूनची आणखी वाटचाल होण्याची शक्यता आहे. आज (ता.१) केरळ, कोमोरीनचा संपूर्ण भाग, तामिळनाडूचा आणखी काही भाग, पदुच्चेरीसह आणखी काही भागात मॉन्सून दाखल होण्यास पोषक हवामान असल्याची शक्यता आहे. 

अरबी समुद्रात आलेल्या ‘अम्फान’ चक्रीवादळामुळे बंगालच्या उपसागरात १७ मे रोजी मॉन्सून दाखल झाला. वादळ उत्तरेकडे सरकून, बाष्प आढून नेल्याने मॉन्सूनची वाटचाल थांबली. २७ मे रोजी मॉन्सूनने पुढे चाल केली. २८ मे रोजी बंगालच्या उपसागरात प्रगती केल्यानंतर पुढील वाटचाल पुन्हा अडखळली आहे. आज दक्षिण बंगालच्या उपसागराच्या काही भागात मॉन्सून दाखल होण्याची शक्यता असल्याचे हवामान विभागाने स्पष्ट केले आहे.