सिंधुदुर्ग ः संचारबंदीमध्ये शिथिलता आणल्यामुळे जिल्ह्यातील सर्व बाजारपेठा दीड महिन्यांच्या प्रदीर्घ कालावधीनंतर गजबजल्याचे चित्र सर्वत्र पाहायला मिळत आहे. वेंगुर्ला वगळता जिल्ह्यातील इतर बाजारपेठांमधील बहुतांशी दुकाने ८ ते १ या वेळेत उघडण्यास स्थानिक प्रशासनाने परवानगी दिली आहे. त्यामुळे ग्राहकांनी खरेदीकरिता झुंबड केली. 

लॉकडाऊन केल्यानंतर जिल्ह्यातील फक्त अत्यावश्‍यक सेवा पुरविणारी दुकाने सुरू होती. संचारबंदीची कडक अंमलबजावणी होत असल्यामुळे कुणीही ग्राहक बाजारपेठांमध्ये येण्यास धजावत नव्हता.वाहने ही बंद असल्यामुळे सर्वांची कुचंबणा झाली होती. परंतु सिंधुदुर्ग जिल्हा आँरेज झोनमध्ये समाविष्ट झाल्यानंतर जिल्ह्यातील संचारबंदीत शिथिलता आणली आहे. 

स्थानिक नगरपालिका, नगरपंचायतींनी आपआपल्या भागातील बाजारपेठांचे नियोजन करावे, असे निर्देश प्राप्त झाले आहेत. त्यामुळे जिल्ह्यातील वेंगुर्ला वगळता इतर सर्वच शहरांतील बाजारपेठा सकाळी ८ ते १ या वेळेत खुल्या करण्यास परवानगी मिळाली आहे.आत्तापर्यंत मेडिकल, किराणा, भाजीपाला, फळविक्री अशी मोजकीच दुकाने सुरू होती. परंतु आता ब्युटीपार्लर, सलून आणि बिअर बार वगळून सर्व दुकाने उघडण्यास परवानगी देण्यात आली आहे. 

त्यामुळे दीड महिन्यांपासून खरेदी खोळंबलेल्या ग्राहकांनी कापड दुकान, चप्पल दुकान, गॅरेज, स्टेशनरी, भांडी दुकान यासह विविध दुकानांमध्ये एकच गर्दी केली. गर्दीचे चित्र सर्वच बाजारपेठांमध्ये पाहायला मिळत होते. स्थानिक प्रशासनाकडून बाजारपेठांचे सर्व्हेक्षण सुरू आहे.या सर्व्हेक्षणाअंती कोणती दुकाने कोणत्या वेळी ठेवावीत याबाबत अतिंम निर्णय घेण्यात येणार आहे.