औरंगाबाद : मराठवाड्यासह इतर जिल्ह्यांमधील शेतकरी उत्पादक कंपन्यांनी हमीदराने खरीप पिकांच्या केलेल्या खरेदीचा आढावा महाएफपीसीने गुरुवारी (ता. २१) औरंगाबादेत घेतला. स्थानिक कृषी विज्ञान केंद्राच्या सभागृहात त्यासाठी आढावा बैठकीचे आयोजन करण्यात आले होते. 

या बैठकीला महाएफपीसीचे अध्यक्ष योगेश थोरात यांच्यासह विठ्ठल पिसाळ, प्रा. गंगाधर शिंदे, प्रशांत पवार, राष्ट्रीय कृषी संशोधन प्रकल्पाचे प्रमुख डॉ. एस. बी. पवार, कृषी विज्ञान केंद्राचे प्रमुख डॉ. किशोर झाडे आदींची उपस्थिती होती. खरीप हंगामात मूग, उडीद, सोयाबीन आदी पिकांची एफपीसीमार्फत हमीदराची उघडली गेलेली केंद्रे, त्यामध्ये झालेली शेतकरी नोंदणी व प्रत्यक्ष खरेदी, हमीदराने शेतीमाल खरेदीत येणाऱ्या अडचणी आदीची मांडणी या बैठकीत करण्यात आली. 

शेतकरी उत्पादक कंपनीच्या प्रतिनिधींनी अडचणींची मांडणी केल्यानंतर विविध पातळ्यांवर त्या अडचणींची सोडवणूक कशा पद्धतीने करता येईल. धोरणात्मक स्तरावर अडचणींची सोडवणूक करण्याच्या बाबी नेमक्‍या कोणत्या याचाही ऊहापोह या बैठकीतून केला गेल्याचे श्री. योगेश थोरात यांनी सांगितले. येत्या काळात तूर खरेदी व रब्बीमधील हरभऱ्याच्या खरेदीची स्थिती नेमकी काय राहील, याचाही आढावा या वेळी घेण्यात आल्याचे थोरात म्हणाले. 

उद्योगातील संधींची चाचपणी करताना तंत्रज्ञानाचा वापर याविषयी परभणी कृषी विद्यापीठांतर्गत कृषी विज्ञान केंद्रासह राष्ट्रीय कृषी संशोधन प्रकल्पाचे शास्त्रज्ञ डॉ. पवार व डॉ. झाडे यांनीही शेतकरी उत्पादक कंपनीच्या प्रतिनिधींना मार्गदर्शन केले. कृषीतील अद्यावत तंत्रज्ञान व उद्योगातील संधीविषयीची माहिती शेतकरी उत्पादक कंपनीच्या प्रतिनिधींना देण्यात आली. ओवा पिकातील संधी पाहून नगर जिल्ह्यातील एका शेतकरी उत्पादक कंपनीने औरंगाबाद जिल्ह्यातील ओवा उत्पादक शेतकऱ्यांशी संवादाची तयारी दाखविल्याचे डॉ. झाडे म्हणाले. 

शेतकरी उत्पादक कंपन्यांच्या दृष्टीने अत्यंत महत्त्वपूर्ण असलेल्या या बैठकीत मराठवाड्यातील आठही जिल्ह्यांसह नगर, पुणे, बुलडाणा, जळगाव आदी जिल्ह्यांतील ८९ शेतकरी उत्पादक कंपन्यांचे प्रतिनिधी सहभागी झाले होते.