अकोला ः ‘कोरोना’ विषाणूची चाचणी करण्यासाठी येथील शासकीय वैद्यकीय महाविद्यालयाशी संलग्न व्हीआरडीएल प्रयोगशाळा (लॅब) उभारण्यात आली आहे. ही प्रयोगशाळा आता नमुने तपासणीसाठी सज्ज झाली असून या प्रयोगशाळेला नवी दिल्ली येथून आयसीएमआर मंजूरी मिळाली आहे. गुणवत्ता चाचणीची प्रक्रिया पार करावी लागेल. त्यानंतर प्रत्यक्ष चाचणीची परवानगी मिळणार आहे, अशी माहिती शासकीय वैद्यकीय महाविद्यालय अकोलाचे अधिष्ठाता डॉ. अपूर्व पावडे यांनी सांगितले. 

अकोल्यात अशा प्रकारच्या प्रयोगशाळेची निर्मिती ही केंद्र शासनाच्या आरोग्य व कुटुंब कल्याण विभाग योजनेअंतर्गत विषाणू संशोधन व निदान प्रयोगशाळा वैद्यकीय महाविद्यालयस्तरावर स्थापन करण्यात येत आहेत. त्याअंतर्गत राज्यात सहा ठिकाणी या प्रयोगशाळा उभारण्यात येत असून त्यातील एक अकोला येथील शासकीय वैद्यकीय महाविद्यालयात उभारण्यात येत आहे. 

अकोला येथील प्रयोगशाळेसाठी शासकीय वैद्यकीय महाविद्यालयाच्या इमारतीत २०० चौरस मीटर जागा देण्यात आली आहे. या इमारतीचे बांधकाम हे जानेवारी महिन्यात पूर्ण झाले आहे. आयसीएमआर या संस्थेतर्फे या प्रयोगशाळा उभारणीसाठी ५० लाख रुपये बांधकाम व अन्य स्थापत्य कामांसाठी तसेच ९३ लाख रुपये यंत्रसामग्री, आवश्यक रसायने, किट्स, उपकरणे व फर्निचर यासाठी मंजूर करण्यात आले. 

या प्रयोगशाळेत बायोसेफ्टी कॅबिनेट, लॅमिनर एअर फ्लो, ऑटोमॅटिक सेंट्रिफ्युगर, डीप फ्रिजर इत्यादी आवश्यक साहित्यही प्राप्त होऊन बसविण्यात आले आहे. ‘कोरोना’ विषाणू चाचणीच्या अनुषंगाने आवश्यक असलेले आरटीपीसीआर हे मशीन आयसीएमआर या संस्थेतर्फे मार्च महिन्यात २४ तारखेला प्राप्त झाले आहे. प्रयोग शाळेचे आवश्यक काम ३० मार्चला पूर्ण झाले आहे. प्रयोगशाळेसाठी लागणारे आनुषंगिक यंत्रे, उपकरणे, रसायने प्राप्त झाली आहेत. आता ही प्रयोगशाळा नमुने तपासणीसाठी सज्ज आहे.