नगर   ः शासनाच्या जलयुक्त शिवार अभियानातून यंदा १४९ गावांत आतापर्यंत सहा हजार ६१ कामे पूर्ण झाली आहेत. या कामांवर सुमारे ६९ कोटी ९२ लाख रुपये खर्च झाले आहेत. यंदाच्या जलयुक्त शिवार अभियानाच्या आराखड्यात १८४ कोटी ३७ लाख रुपयांची ६२६९ कामे प्रस्तावित केली आहेत. या कामांना मात्र जोरदार पावसाची प्रतीक्षा आहे. 

नगसह राज्यातील अनेक जिल्ह्यांनी गेल्या अनेक वर्षांपासून सातत्याने दुष्काळाशी सामना केला आहे. त्यामुळे टंचाईशी सामना करणाऱ्या व गेली काही वर्षे टॅंकरने पाणीपुरवठा होत असलेल्या गावांत पाणी साठवण क्षमता वाढावी, यासाठी शासनाने २०१५ पासून सिंचनाच्या विविध योजनांचा ताळमेळ घालत जलयुक्त शिवार अभियान सुरू केले. अभियानात लोकसहभाग वाढून चांगली कामे झाली असल्याने त्याचा अनेक गावांना फायदाही होत आहे.

यंदाच्या वर्षी निवड झालेल्या गावांत कामे करण्यासाठी १८४ कोटी ३७ लाख रुपयांचा आराखडा केला आणि त्यानुसार ६२६९ कामे प्रस्तावित केली होती. त्या सर्व कामांना प्रशासकीय आणि तांत्रिक मान्यता देण्यात आली. ४७५४ कामांच्या निविदा काढण्याची गरज होती. त्यानुसार त्यांच्या निविदांची प्रक्रिया पूर्ण झाली. १५१० कामांच्या निविदा काढण्याची गरज पडली नाही. प्रस्तावित सर्व कामांना कार्यारंभ आदेशही दिले आणि सर्व कामे सुरूही झाली. त्यातील आतापर्यंत ६०६१ कामे पूर्ण झाली आहेत.  

कृषी विभागाने दिलेल्या माहितीनुसार पालकमंत्री राम शिंदे यांच्या जामखेड तालुक्यातील कामांची माहिती मात्र उपलब्ध नाही. जलयुक्त शिवार अभियानाच्या कामांतून अनेक गावांना चांगला फायदा झालेला असला तरी, मागील काही वर्षांत जलयुक्त शिवार अभियानातील कामांबाबत तक्रारीही झाल्या होत्या, त्याचे पुढे काय झाले. याबाबत मात्र कृषी विभागाकडून सांगितले जात नाही.